Miðvikudagur 04.01.2012 - 14:16
- Ummæli
()
Árlegar vaxtagreiðslur af gjaldeyrisforða Seðlabankans eru álíka háar og heildarkostnaður hefði orðið við Icesave-samninginn. Gjaldeyrisvaraforðinn er nú 1.030 milljarðar króna, hann er allur tekinn að láni, að mestu frá Norðurlöndum. Árlegar vaxtagreiðslur nema um 33 milljörðum króna.
Þetta kom fram í samtali við Jón Daníelsson, hagfræðing við London School of Economics, í hádegisfréttum RÚV. Hann segir að gjaldeyrisforðinn sé í stærra lagi miðað við uppbyggingu efnahagslífsins og mun stærri en flest lönd í heiminum eru með. Spurning sé hvort ekki mæti fara betur með þá 33 milljarða sem fara árlega í að greiða vexti af þeim lánum sem mynda forðann.
„Skuldsettur varasjóður er ekki alvöruvarasjóður,“ sagði Jón. „Þetta eru peningar sem eru teknir að láni og þarf að greiða aftur og þess vegna þarf Seðlabankinn að fara varlega í að beita honum ef þörf er á. Þess vegna væri mun betra að byggja upp varasjóð með eigin peningum íslenska ríkisins heldur en að taka peninginn að láni. Ég held að það séu mjög fá eða engin lönd með skuldsettan varaforða.“
Jón sagði að þau lönd sem hefðu áður fyrr byggt upp varaforða með lánum hefðu lent í erfiðleikum, til dæmis Argentína sem hefði lent í erfiðleikum með að greiða af þeim lánum sem tekin voru til að búa til forðann.
