Mótmælendur loka fyrir umferð að Straumsvík

Um 20 mótmælendur á vegum samtakanna Saving Iceland hafa stöðvað alla umferð að álverinu í Straumsvík. Þá hafa nokkrir mótmælendur farið inn á vinnusvæðið. Lögreglan hefur nú þegar handtekið þrjá mótmælendur. Þetta kemur fram á Vísi.is.

Vitnað er í yfirlýsingu frá samtökunum þar sem fram kemur að með þessu vilji þau mótmæla fyrirhuguðu álveri Rio Tinto-Alcan á Keilisnesi eða Þorlákshöfn. Þá er einnig stækkun álversins í Hafnarfirði mótmælt og nýju álveri í Suður-Afríku sem keyrt verður áfram af kolum og kjarnorku.