Dagur fagnaðarláta í Írak – sameinast í gleði yfir sigri í Asíukeppni í knattspyrnu

Gríðarleg fagnaðarlæti brutust út í Írak í dag þegar íraska knattspyrnulandsliðið tryggði sér Asíumeistaratitilinn með því að leggja Sádí-Arabíu að velli, 1-0, í úrslitaleik í Indónesíu.

Landsliðsfyrirliðinn Younis Mahmoud tryggði Írak sigurinn með skallamarki 19 mínútur fyrir leikslok – þetta er í fyrsta skipti sem Írak vinnur sigur í alþjóðlegri knattspyrnukeppni og brutust út mikil fagnaðarlæti í landinu, sem er venjulega uppspretta frétta af stríði, hörmungum og mannskaða. Um skeið virtist sem þjóðin legði borgarastríð og trúarbragðadeilur til hliðar og sameinaðist í fögnuðu yfir sigri knattspyrnulandsliðsins.

„Þetta snýst ekki bara um knattspyrnu, þetta er miklu mikilvægara en það,“ sagði Jorvan Vieira, brasilískur landsliðsþjálfari Íraks á blaðamannafundi eftir leikinn. „Þetta hefur fært landinu öllu mikla hamingju, þetta snýst ekki um eitt knattspyrnulið, þetta snýst um manneskjur.“

Enginn landsliðsmannanna hefur sloppið undan hörmungum stríðsins, að minnsta kosti þrír þeirra hafa misst ættingja undanfarna tvo mánuði og léku þeir með sorgarbönd í úrslitaleiknum til minningar um þá 50 sem létust í sprengjuárás sem gerð var á miðvikudaginn í Bagdad meðan mannfjöldi var að fagna því að liðið hafði tryggt sér rétt til að leika úrslitaleikinn í dag.

Í Bagdad flykktist fólk út á götur þegar úrslit lágu fyrir. Hleypt var af skotum og fagnaðarlætin voru gríðarleg. Íraskur almenningur fagnaði því að knattspyrnulandsliðið hefði sýnt að þjóðin gæti sameinast en um leið lét fólk í ljós vonbrigði sín með að stjórnmálamönnum þjóðarbrotanna þriggja sem byggja landið hefði ekki tekist hið sama. „Þessar hetjur sýna umheiminum hvernig Írak er í raun og veru. Þeir hafa gert þjóðinni gagn, öfugt við stjórnmálamenning sem stela af þjóðinni og drepa hverjir aðra, “ sagði Sabah Shaiyal, 43 ára lögreglumaður í Bagdad. „Við erum stolt af leikmönnunum en ekki af ágjörnum stjórnmálamönnum. Landsliðið hefur sýnt okkur að það er til eitthvað sem heitir eitt, sameinað Írak.