Bretland: Tengsl aukaefna í mat og ofvirkni staðfest í nýrri rannsókn

Tengsl auka- og litarefna í unnum matvælum við ofvirkni og frávikshegðun hjá börnum eru staðfest í nýrri rannsókn sem mikið er fjallað um í breskum fjölmiðlum í dag. Breska matvælaeftirlitið hefur ákveðið að endurskoða tilmæli til neytenda og varar nú foreldra barna, sem sýna einkenni ofvirkni eða ofvirkni með athyglisbresti. við því að láta börnin neyta varnings sem í eru tiltekin E-merkt aukaefni

Rannsóknin, sem þessi ákvörðun byggist á, er sú stærsta sem gerð hefur verið í Bretlandi á tengslum ofvirkni og aukaefna í matvælum en fjallað er um niðurstöður hennar í breska læknatímaritinu Lancet í dag.

Í dagblaðinu Guardian er fjallað um málið í dag og þar gagnrýna sérfræðingar að stjórnvöld bregðist ekki nógu hart við þessum niðurstöðum, – rétt hefði verið að banna neyslu aukaefnanna algjörlega í stað þess að leggja foreldrunum þær byrðar á herðar að gera þau ábyrg í málinu. Stjórnvöld hvetja fullorðna til að lesa merkingar á matvælum en mikið af sælgæti og kökum, með aukaefnunum í – einnig rjómaís – eru seld í lausasölu án slíkra miða,
Þá eru stjórnvöld gagnrýnd fyrir að gefa ekki út leiðbeiningar til breskra skóla um það hvernig taka eigi mið af þessum niðurstöðum þegar útbúnir eru matseðlar fyrir skólamáltíðir.

Breska matvælaeftirlitið svarar gagnrýninni með því að vísa málinu til Matvælaeftirlits Evrópusambandsins og vill að það taki afstöðu til þess að leyfa eða banna efnin við heildarendurskoðun reglna sambandsins um matvælaöryggi og hollustuhætti.

Talið er að 2,4%-5% Breta þjáist af ofvirkni með athyglisbresti (ADHD) en ekki er vitað hve marga mætti greina með önnur afbrigði ofvirkni.

Það voru vísindamenn við Southampton háskóla sem unnu nýju rannsóknina og skráðu viðbrögð 153 þriggja ára barna og 144 átta til níu ára barna við aukaefnum sem blandað var í ýmsa drykki. Blandan miðaðist við algengar, daglegar máltíðir barna. Niðurstaðan var sú að litarefni og aukaefni höfðu skaðleg áhrif. Meðal efnanna sem könnuð voru er sodium benzoate og önnur auka- og litarefni sem eru algeng í gosdrykkjum.

Niðurstaðan var sú að þegar börn fengu drykkinn sem rannsóknin byggðist á jókst ofvirkni. Svörunin var hins vegar breytileg, áhrifin voru umtalsverð hjá sumum barnanna en engin hjá öðrum. Áhrifin komu jafnt fram hjá börnum sem greind höfðu verið með ofvirkni og öðrum.

„Við höfum fengið augljósa vísbendingu um að blanda ákveðinna litarefna og benzoate rotvarnarefna getur haft neikvæð áhrif á hegðun barna. Áður voru komnar fram vísbendingar um að sum börn með hegðunarfrávik hefðu gott af því að neyta matar án litarefna,“ er haft eftir Jim Stevenson, prófessor við Southampton-háskóla í Guardian.

Talsmaður Stuðningshóps barna með ofvirkni segir í samtali við Guardian: „Þessi rannsókn staðfestir það sem mörg okkar hafa vitað í 30 ár. En við lýsum miklum efasemdum um viðbrögð stjórnvalda. Er það raunhæft að ætlast til þess að foreldrar spyrji skólastjórnendur út í aukaefni í skólamáltíðum, eða að láta foreldra um að rannsaka innihaldið í blandi í poka?“

Diet Coke og Skittles eru aðeins tvö dæmi um fjölmörg matvæli og sætindi sem umrædd efni eru í.

—-

Grein Guardian.