Ekki nóg að eiga milljarð dala til að komast inn á Forbes listann

Nú nægir ekki lengur að eiga milljarð dala til að ná inn á lista Forbes tímaritsins yfir 400 ríkustu menn Bandaríkjanna. Neðstu mennirnir á listanum eiga 1,3 milljarða dala. Milljarðamæringarnir sem ekki komust inn á listann núna eru 82 talsins.

Samanlagðar eignir auðmannanna á listanum, sem var birtur í gær eru 1,54 billjónir dala, samanborið við 1,25 billjónir í fyrra.

Engar breytingar urðu á toppsætum listans. Bill Gates stofnandi Microsoft er enn ríkastur, 14. árið í röð. Eignir hans eru metnar á 59 milljarða dala. Warren Buffet er í öðru sæti með 52 milljarða og Sheldon Adelson, spilavítaeigandi er í þriðja með 28 milljarða. Larry Ellison hjá hugbúnaðarrisanum Oracle er svo í fjórða sæti eins og í fyrra með 26 milljarða.

Stofnendur Google, Sergey Brin og Larry Page komust í fyrsta skipti inn á topp 10. Þeir eru jafnir í 5. sæti með 18,5 milljarða dala hvor. Sem þýðir að auður þeirra hefur fjórfaldast á einu ári. Hlutabréf Google hafa hækkað um 500% á sama tíma.