Margir geðsjúkir tifandi tímasprengjur – fá ekki hjálp

Skeytingarleysi í garð geðsjúkra birtist í ýmsum myndum og ein þeirra er að þeir eru bornir út af heimilum sínum. Sveinn Magnússon, framkvæmdastjóri Geðhjálpar, segir í viðtali í Fréttablaðinu í dag að þessum grimmilegu aðgerðum sé beitt á geðsjúka.

Hann segir þó óumdeilt að geðsjúkir valdi oft vandamálum í nábýli við aðra, en segir vandamálið skýrt í sínum huga.

Það hafi einfaldlega ekki tekist að framfylgja heildarstefnu í málefnum geðsjúkra og samvinnu félags- og heilbrigðisráðuneytis sé ábótavant. Mun skipulegar þurfi að vinna að geðheilbrigðismálum.

Sigurður Helgi Guðjonsson, formaður húseigendafélagsins, segir að oft berist inn á borð hjá sér kvartanir vegna geðsjúks fólks og segir að stundum sé beinlínis um hættu að ræða.

Sveinn tekur undir það og segir þá veikustu í hópi geðsjúkra tifandi tímasprengjur. Þeir séu hættulegir því þeim hafi ekki verið sinnt vegna veikinda sinna. Ef þeir fengju hinsvegar stuðning til sjálfshjálpar væri hægt að gera kraftaverk.