Evrópunefnd forsætisráðherra tekur til starfa eftir helgi

Nefnd forsætisráðherra um þróun Evrópumála undir tvíhöfða formennsku stjórnarþingmannanna Ágústs Ólafs Ágústssonar og Illuga Gunnarssonar tekur til starfa eftir helgi. Nefndin mun hittast á sínum fyrsta fundi á þriðjudag.

Síðustu daga hefur verið gengið frá tilnefningum í nefndina sem verður skipuð  fulltrúum annarra þingflokka, auk fulltrúa frá ASÍ, BSRB, Samtökum atvinnulífsins og Viðskiptaráði Íslands.

Nefndin hefur það hlutverk, í samræmi við stefnuyfirlýsingu ríkisstjórnarflokkanna, að fylgja eftir tillögum Evrópunefndar frá mars 2007 um aukna þátttöku stjórnmálamanna og embættismanna í hagsmunagæslu tengdri Evrópustarfi. Hún á einnig að gera athugun á því hvernig hagsmunum Íslendinga verði best borgið í framtíðinni gagnvart Evrópusambandinu og fylgjast með og leggja mat á breytingar í Evrópu út frá hagsmunum Íslendinga og hafa samráð við innlenda sérfræðinga og hagsmunaaðila eftir þörfum.