Ofbeldi lögreglumanns á myndbandi til rannsóknar

Myndband sem birtist á netinu og sýnir lögreglumann taka harkalega um háls á pilti í verslun 10-11 í Grímsbæ á Bústaðavegi hefur leitt til þess að viðkomandi lögreglumaður sinnir ekki störfum hjá lögreglunni meðan mál hans er í rannsókn.

Lögreglan á höfuðborgarsvæðinu segir í tilkynningu í dag, að um leið og ábendingar bárust lögreglu um þetta myndband hafi strax hafist athugun á því hvenær þetta hafi gerst og hvaða lögreglumaður hafi verið þarna á ferðinni, „enda er framgangan með þeim hætti að það krefst að mati lögreglustjóra rannsóknar.“

„Ríkissaksóknara var þegar gert viðvart um þetta atvik vegna alvarleika þess. Að lokinni gagnaöflun síðar í dag verður málið formlega sent ríkissaksóknara til rannsóknar, en hann fer samkvæmt lögreglulögum með rannsókn mála sem snerta meint brot lögreglumanna í starfi. Ríkislögreglustjóra verður einnig gert viðvart um málið en hann fer með skipunarvald yfir lögreglumönnum og tekur því ákvörðun um hvort lögreglumanninum verður vikið frá störfum um stundarsakir meðan á rannsókn málsins stendur. Fram að því að ákvörðun um það liggur fyrir mun lögreglumaðurinn ekki sinna störfum hjá lögreglunni á höfuðborgarsvæðinu,“ segir í tilkynningunni.

Í umsögn um myndbandið frá þeim sem setti það á YouTube, segir að lögregla hafi grunað piltinn um þjófnað í versluninni en reynst saklaus og ekkert hafi fundist á honum. Eftir einhver orðaskipti lögreglumannsins og piltsins, þar sem pilturinn hafi haldið fram sakleysi sínu og notað orðið „fucking“ virðist lögreglumaðurinn ráðast með hálstaki að piltinum fyrir að vera með „kjaft.“