Ólafur gefur Jemenmarkaði landsliðstreyju nr 11

Ólafur Stefánsson landsliðsfyrirliði gaf Jemen-markaðnum í gær treyjuna sem hann klæddist í úrslitaleiknum á Ólympíuleikunum.

Treyjan er árituð af öllum leikmönnum liðsins. „Áfram Ísland, segi ég bara,“ segir Áslaug Hulda Jónsdóttir, einn skipuleggjenda uppboðsins um gjöf Ólafs í samtali við Fréttablaðið.

Björk Guðmundsdóttir gefur að auki kjól úr sinni einkaeigu til uppboðsins í dag. Kjólnum klæddist Björk í myndbandinu við lagið Alarm Call, sem kom út árið 1998. Áslaug segir um einstaka flík sé að ræða enda hönnuður kjólsins Alexander McQueen.

Uppboðið verður haldið á morgun og er hluti af Jemen-markaðnum sem verður í Perlunni. Ágóðinn rennur til byggingar skóla fyrir fátæk börn og konur í Jemen.