Peningar gufa upp í kerfinu

Námsmenn erlendis þurfa að bíða þess að nýir bankar verði stofnaðir svo þeir geti millifært af innlendum á erlenda reikninga.  Þetta kemur fram á RÚV en þar segir að þeir námsmenn sem skipta við Glitni og Landsbankann ættu að geta millifært á reikninga sína erlendis eftir að bæði nýr Landsbanki og nýr Glitnir hafa verið stofnaðir.

Á heimasíðum Spron og Byrs kemur fram að námsmenn njóti forgangs við gjaldeyrisviðskipti.

Íslensk fjölskylda í Danmörku finnur ekki 300.000 krónur sem hún millifærði af reikningi Kaupþings á reikning Danske Bank en samkvæmt upplýsingafulltrúa Kaupþings eru enn hnökrar á gjaldeyrismillifærslum.

Hann segir að allar beiðnir um gjaldeyrisfærslur verði að senda til Seðlabankans og að þar sé mikið álag.