Almennir bankastarfsmenn leita sálfræðihjálpar – taka inn á sig þjáningar viðskiptavinanna

Í kjölfar bankahrunsins hefur fjöldi bankastarfsmanna leitað sér sálfræðiaðstoðar, en að sögn Þórkötlu Aðalsteinsdóttur sálfræðings er um að ræða ákveðna áfallahjálp fyrir starfsfólk bankanna.

Þórkatla, sem hefur sinnt fjölmörgum bankastarfsmönnum, segir í viðtalið við Fréttablaðið að starfsfólkið taki inn á sig umræðu um bankana í þjóðfélaginu. Það taki nærri sér að horfa upp viðskiptavini í miklum erfiðleikum og vera ekki í aðstöðu til að hjálpa. Þessi óvissa gangi nærri bankastarfsmönnum, sem vinna við að liðsinna fólki í peningamálum.

Friðbert Traustason, formaður Samtaka starfsmanna fjármálafyrirtækja, segir þetta rétt, starfsfólk bankanna taki hrunið mjög inn á sig.

Hann gagnrýnir að fólk í opinberri umræðu noti orðið „bankamenn“ yfir alla starfsmenn bankanna, án tillits til þess hvort um sé að ræða yfirmenn eða starfsfólk á gólfi.

Síðarnefndi hópurinn hafi ekkert gert af sér nema vinna í banka og ósanngjarnt að setja alla undir sama hatt.

Þórkatla telur þó sögur um leiðindi viðskiptavina bankanna séu ýktar.