Björgólfur Thor: Með um tuttugu félög í Lúxemborg en nafnið hvergi á blaði

Þrátt fyrir að í Lúxemborg séu skráð níu mismunandi Novator-félög og að minnsta kosti tíu önnur félög, sem virðast tengjast auðmanninum Björgólfi Thor Björgólfssyni, er nafn hans hvergi að finna í skráðum gjörningum í lögbirtingablaðinu þar í landi.

Eina félagið sem bendir beint til Björgólfs Thors er félag á Tortólu-eyju sem heitir Beeteebee, upphafsstafir hans stafaðir á ensku. Það félag lagði stofnfé í Lúxemborgar-félag sem tengist Björgólfi Thor.

Sama hátt hefur fjöldi íslenskra kaupsýslumanna haft á umsvifum sínum í skattaskjólum erlendis.

Þetta kemur fram í grein um falda eigendur íslenskra félaga í Lúxemborg sem Sigrún Davíðsdóttir skrifar í nýjasta tölublað Tíundar, fréttablaðs ríkisskattstjóra.

Björgólfur Thor Björgólfsson er enn talinn auðugastur Íslendinga þrátt fyrir að hafa orðið fyrir miklum skakkaföllum í bankahruninu og alþjóðlegu fjármálakreppunni. Hann hefur stundað fjárfestingar víða um lönd. Sigrún Davíðsdóttir segir í greininni í Tíund að að baki félaga sem hann á eða á í og eru í rekstri liggi víðtækt og ekki sérlega sýnilegt net eignarhaldsfyrirtækja sem spannar mörg lönd. Út frá félögum Björgólfs Thors í Lúxemborg megi sjá að hann tengist félögum á Cayman-eyjum, í Delaware, á Gíbraltar, Guernsey, Tortólu, Tyrklandi, Íslandi og Tékklandi að ógleymdri Kýpur.

„Þarna koma því fyrir margir þeirra staða sem eru þekktir fyrir að vera skjól umsvifa sem á að halda utan sjónmáls skattyfirvalda og annarra eftirlitsstofnana“ segir Sigrún.

Grein Sigrúnar Davíðsdóttur og annað efni Tíundar má lesa hér.