Deloitte kannaði bakgrunn Spork og fann ekkert misjafnt. Sakaður um stórfelld fjársvik í Kanada

Lögmaður Snæfellsbæjar fékk endurskoðunarfyrirtækið Deloitte til að kanna bakgrunn Hollendingsins Otto Spork og fyrirtækis hans Sextant Capital áður en gengið var til samninga við hann um vatnsréttindi og byggingu vatnsverksmiðju á Rifi. Var annars vegar kannað hvort eitthvað kæmi fram misjafnt gagnvart yfirvöldum og hins vegar hvort eitthvað misjafnt hefði komið fram í fjölmiðlum. Ekkert neikvætt kom í ljós.  Ekki var talin ástæða til að kanna málið frekar því það hefði kostað Snæfellsbæ töluverðar fjárhæðir.

Þetta kemur fram í viðtali við Kristinn Jónasson bæjarstjóra Snæfellsbæjar sem birt er í héraðsfréttablaðinu Skessuhorni. Viðtalið er endurbirt á vef blaðsins um páskana „að beiðni hagsmunaaðila“,  eins og það er orðað.

Í fréttaskýringu á Eyjunni 30. mars og í fréttum í DV hefur komið fram að Spork, sem búsettur er á Íslandi,  er sakaður um stórfelld fjársvik í Kanada þar sem hann hefur einnig búið og haft umsvif.

Í viðtali Skessuhorns við bæjarstjóra Snæfellsbæjar kemur fram að bjartsýni ríkir á staðnum um að vatnsverksmiðjan verði að veruleika og að staðið verði við þá samninga sem gerðir hafa verið. Hann segir að verksmiðjan muni skapa tugi starfa og því séu verulegir hagsmunir í húfi að ekki verði bakslag í fyrirætlunum með uppbygginguna. Þegar sé byrjað að byggja verksmiðjuhúsið sjálft og leggja vatnslögn að svæðinu. Bæjarstjórinn segir að hagur Snæfellsbæjar til lengri tíma verði fyrst og fremst þær útsvarstekjur sem verði til hjá fólkinu sem mun vinna við vatnsverksmiðjuna. Einnig aðrar tekjur eins og til dæmis fasteignagjöld og hafnargjöld auk afleiddra starfa sem af verksmiðju sem þessari hljótist.

Í viðtalinu segir Kristinn Jónasson bæjarstjóri vera orðinn langþreyttur á því viðhorfi sem sér finnist allt of margir sem á höfuðborgarsvæðinu búa hafi til landsbyggðarinnar. „Ef við ætlum að framkvæma eitthvað, til dæmis í vegagerð, þá má helst ekki hreyfa við nokkrum steini. Náttúran okkar sé svo viðkvæm.  En ef framkvæmdirnar eru á höfuðborgarsvæðinu þá má öllu umturna í nafni uppbyggingar. Nefni ég sem dæmi hraunið milli Garðabæjar og Hafnarfjarðar sem að mestu leyti er horfið og þá má einnig nefna sem dæmi framkvæmdirnar við Hellisheiðarvirkjun.  Fók verður að skilja að til að byggð verði til staðar í öllu landinu þá þarf fólk sem úti á landi býr jafn mikið á nútímaþjónustu að halda og þeir sem búa á höfuðborgarsvæðinu. Við skiljum þetta sem búum úti á landi og ætlumst til að fólkið sem býr í höfuðborginni geri það einnig.  Þróun lands krefst þess að kostir séu metnir og þá þarf að hafa mannfólkið líka með þegar áhrif einstakra framkvæmda eru metnar. Ég nefni þetta hér til að slá á þær gagnrýnisraddir sem heyrst hafa vegna þess að við höfum nú náð árangri og sýnt frumkvæði í að laða ný fyrirtæki hingað á svæðið. Reynslan hefur einfaldlega sýnt okkur að við þurfum sjálf að berjast fyrir okkar framfaramálum, hvort heldur sem er í þessu tiltekna máli um vatnsverksmiðjuna eða í öðrum,“ er haft eftir bæjarstjóranum.

Viðtalið við Kristinn Jónasson bæjarstjóra má lesa í heild hér.