Gylfi Magnússon: Svigrúm fyrir jafn hraða lækkun vaxta og verðbólgu

Gylfi Magnússon viðskiptaráðherra segist telja að svigrúm sé fyrir að nafnvextir lækki jafnhratt og verðbólgan og að hann myndi fagna djarfri ákvörðun Seðlabankans um vaxtalækkun.

Þetta kemur fram í frétt mbl.is af blaðamannafundi ríkisstjórnarinnar í Þjóðmenningarhúsinu í dag, þar sem Jóhanna Sigurðardóttir forsætisráðherra og Steingrímur J. Sigfússon fjármálaráðherra sitja fyrir svörum. Jóhanna sagðist sjá fyrir sér hraða lækkun vaxta og að þeir gætu verið komnir í 2-3% í árslok

Næsti vaxtaákvörðunardagur Seðlabankans er núna á fimmtudaginn.

Ráðherrarnir sögðu að nú lægju fyrir nýjar upplýsingar um skuldastöðu heimila og að á grundvelli þeirra verði hægt að taka ákvörðun um hvort grípa þurfi til frekari aðgerða til að koma til móts við skuldug heimili.  Á fundi ríkisstjórnarinnar í morgun var ákveðið að senda Seðlabanka Íslands tillögur umboðsmanns neytenda um neyðarlög um niðurfærslu lána til umsagnar.