„Eignir“ gufa upp – afskrifa þarf kvótaeign úr bókum fyrirtækja

„Aflaheimildir hafa ekki verið afskrifaðar í ársreikningum undanfarin ár. Það hefur byggst á því að auðlindin sé endurnýjanleg. Þess vegna hefur ekki verið takmarkaður nýtingartími fyrir hendi.  Ef það á að taka aflaheimildir af fyrirtækjum, með þeim hætti sem lýst hefur verið, þ.e. 5 prósent á ári í 20 ár, þá finnst mér liggja nokkuð beint við að það þurfi að afskrifa heimildirnar, þ.e. að segja aflaheimildir sem menn hafa keypt og eignfært,“ segir Sæmundur Valdimarsson, endurskoðandi hjá KPMG, í Morgnblaðinu í dag, um áhrif fyrningarleiðar á efnahag sjávarútvegsfyrirtækja.

Aflaheimildir eru metnar á um 150 til 200 milljarða inni í efnahagsreikningum sjávarútvegsfyrirtækja. Útvegsmenn hafa áhyggjur af því að nú þegar, við stefnu ríkisstjórnarinnar um innköllun aflaheimilda, hafi bókfærðar eignir þeirra skerst. Verði þessar eignir niðurfærðar getur eiginfjárstaða margra sjávarútvegsfyrirtækja orðið neikvæð, og tæknilegt gjaldþrot þar með staðreynd.

Atli Gíslason, þingmaður Vinstri grænna á Suðurlandi og fulltrúi í sjávarútvegsnefnd Alþingis, segist alla tíð hafa haft efasemdir um veðsetningar á aflaheimildum. Hins vegar verði stjórnvöld að vera tilbúin að vinna með útgerðarmönnum þegar breyta á fiskveiðistjórnunarkerfinu. »Ég hef alla tíð haft efasemdir um veðsetningu á aflaheimildum. Eitt af stóru vandamálum sjávarútvegsins nú er yfirveðsetning aflaheimilda. Hins vegar er ég á því að það verði að kanna öll sjónarmið, ekki síst þau sem koma frá útgerðarmönnum, áður en ráðist er í breytingar. Það má ekki kollvarpa efnahagslífinu meira en orðið er. Ef áhrifin af fyrningarleiðinni verða þau að gjaldþrot blasi við, eins og útgerðarmenn hafa haldið fram, verður að finna nýjar leiðir.«