Ræningjar notuðu þyrlu í stórfelldu peningaráni í Stokkhólmi

Sænska lögreglan leitar nú ræningja sem notuðu stolna þyrlu til að ræna peningageymslu öryggisfyrirtækisins G4S í Stokkhólmi snemma í morgun.

Ræningjarnir sigu úr þyrlunni niður á þak geymslunnar, sem er í úthverfinu Västberga, og brutu sér leið inn. Síðan kváðu við sprengingar. Skömmu síðar sáust mennirnir troða pokum sem talið er að hafi verið fullir af peningum inn í þyrluna, sem síðan var flogið á brott.

Dularfullum sekk hafði verið komið fyrir á þyrlupalli lögreglunnar í Stokkhólmi sem kom í veg fyrir að þyrla lögreglunnar gæti hafið sig á loft þaðan til að veita ræningjunum eftirför.

Ekki er vitað hversu miklum peningum var stolið, en talið að það upphæðin sé umtalsverð. Lögreglan fann síðan þyrlu ræningjana í skógi norður af Stokkhólmi. Hún var tóm.

Samkvæmt frétt Dagens Nyheter á netinu telur lögreglan að ræningjarnir leynist enn í skóginum og leitar þeirra þar.

Sjá einnig myndbandsupptökur frá í morgun af þyrlunni á flugi.