Líklegt að þingmenn vilji svör ráðherra um mál Kaupþings og Haga í fyrirspurnartíma

Líklegt er talið að áform Nýja Kaupþings um 50 milljarða niðurfellingu skulda Haga, verslanakeðju Jóns Ásgeirs Jóhannessonar, komi til umræðu í fyrirspurnartíma á Alþingi í dag.

Steingrímur J. Sigfússon fjármálaráðherra og Gylfi Magnússon viðskiptaráðherra sitja þá fyrir svörum þingmanna í óundirbúnum fyrirspurnartíma.

Áform Kaupþings hafa skapað miklar umræður og ólgu í þjóðfélaginu, en bankinn fullyrðir að endanlegar ákvarðanir hafi ekki verið teknar.

Svokallaðri kjördæmaviku er lokið og hefjast þingfundir að nýju kl. 15 í dag. Að loknum fyrirspurnum til ráðherra verða nokkur mál tekin til afgreiðslu.

Þingmenn voru flestir mættir á skristofur sínar í morgun og þrjár fastanefndir sátu á fundi: fjárlaganefnd, heilbrigðisnefnd og iðnaðarnefnd. Á fund fjárlaganefndir voru væntanlegir ýmsir gestir til að ræða fjárlagafrumvarpið.