Deilt um það hvort lagasetningu þurfi vegna yfirtöku kröfuhafa á Arion banka og Íslandsbanka

Enn er ágreiningur í fjárlaganefnd Alþingis um hvort sérstaka heimild ríkisins þurfi vegna yfirtöku kröfuhafa á Arion banka og Íslandsbanka. Nefndin kom saman í gærkvöldi og ætlar að hittast aftur um hádegisbil í dag.

Frá þessu var sagt í fréttum Ríkisútvarpsins í morgun.

Fram kom að fjárlaganefnd ræddi í gærkvöldi yfirtöku kröfuhafa í gamla Kaupþingi á meirihluta í Arion banka annars vegar, og yfirtöku kröfuhafa Glitnis á meirihluta í Íslandsbanka hins vegar.

Í fréttinni kom fram að skiptar skoðanir eru innan nefndarinnar um hvort skoða eigi þessa gerninga sem sölu ríkisins á bönkunum tveimur, eða sem einhvers konar hlutafjáraukningu. Sé um sölu á eign ríkisins að ræða þarf heimild frá Alþingi, en annars ekki. Fulltrúar minnihlutans eru þeirrar skoðunar að ríkið hafi að fullu og öllu átt hina nýju banka og hafi selt bróðurpart beggja til kröfuhafa. Slíkt hefði þá helst þurft að heimila í fjáraukalögum, en þau er reyndar búið að samþykkja, og því þurfi að setja sérstök lög um yfirtökuna, eða söluna.
Stjórnarfulltrúarnir eru hins vegar á því að ríkið haldi sínum hluta óskertum, en við bætist hlutur kröfuhafa, og því þurfi ekki sérstaka lagaheimild.

Ríkisútvarpið sagði að embættismenn frá Ríkisendurskoðun og fjármálaráðuneyti hafi komið fyrir fjárlaganefndi í gær til að fara yfir málið og muni leggja tillögur fyrir fjárlaganefnd á allra næstu dögum.