Rætt um breytilega vexti á Icesave-skuld. Bretar og Hollendingar krefjast greiðsluviðurkenningar

Bretar og Hollendingar eru tilbúnir að ræða breytingu á vaxtakjörum Icesave, en í staðinn krefjast þeir pólitískrar samstöðu hérlendis og viðurkenningar á greiðsluskyldu.

Fréttablaðið segir frá þessu í dag.

Frá synjun forseta hafa íslensk stjórnvöld átt í stöðugum óformlegum viðræðum við yfirvöld í Bretlandi og Hollandi. Þær viðræður færðust á formlegt stig með fundi formanna þriggja íslenskra stjórnmálaflokka og ráðherrum frá Bretlandi og Hollandi í Haag á föstudag.

Samkvæmt heimildum Fréttablaðsins er tvennt ófrávíkjanleg krafa viðsemjenda Íslendinga. Annars vegar þverpólitísk íslensk sátt og hins vegar viðurkenning á skuldbindingum Íslendinga sem nema lágmarkstryggingu innstæðutryggingakerfis samningsins um Evrópska efnahagssvæðið; 20.887 evrum að hámarki á hvern reikning.

Óttast seinagang og synjun forseta að nýju

Öll vinna í málinu innanlands miðar að þessu. Bretar og Hollendingar óttast að niðurstaða nýrra samninga, verði af þeim, fari sömu leið og fyrri samningar; þurfi langan tíma í meðförum Alþingis og hljóti að því búnu synjun forseta.

Samkvæmt heimildum Fréttablaðsins deila þingmenn annarra Evrópuþjóða þessum áhyggjum. Hafa þær komið fram í samtölum um lán sem tengjast efnahagsáætlun Íslands og Alþjóðagjaldeyrissjóðsins.

Bretar og Hollendingar leggja einnig áherslu á að allar viðræður gangi fljótt yfir, verði af þeim.

Fréttablaðið hefur heimildir fyrir því að meðal þeirra útfærslna sem ræddar hafi verið sé að lánin verði á breytilegum vöxtum fyrri hluta lánstímans, en síðan á föstum vöxtum. Breytilegir vextir taka mið af millibankavöxtum í Evrópu, sem eru mjög lágir um þessar mundir.

Þetta er tvíeggja sverð, því óvíst er hver vaxtaþróun verður út lánstímann. Þess vegna er rætt um blöndu breytilegra og fastra vaxta.