Björgvin svarar Wellink í Hollandi: Íslendingar lugu aldrei, ásakanir stórkostlega villandi

Björgvin G. Sigurðsson, fyrrverandi viðskiptaráðherra, svarar hollenska seðlabankastjóranum fullum hálsi í hollenska blaðinu de Volkskrant í dag, en Hollendingurinn hefur undanfarna daga sagt í yfirheyrslum að Íslendingar hafi logið að þeim um stöðu íslensku bankanna fyrir hrun. Björgvin segir hollenska seðlabankastjórann fara með staðlausa stafi í því sambandi og að fullyrðingar hans séu stórkostlega villandi.

Grein Björgvins hefur vakið mikla athygli í Hollandi og verður jafnframt viðtal við hann í hollenska sjónvarpinu í kvöld.

Alvarlegar ásakanir

Björgvin segir alvarlegt þegar seðlabankastjóri Hollands, Nout Wellink, fari svo frjálslega með staðreyndir og að hann sjálfur, sem fyrrverandi bankamálaráðherra, sjái sig knúinn til að taka málflutning hans alvarlega og að svara honum.

Björgvin telur fyrirliggjandi, að fjármálaeftirlit allra landanna þriggja hafi mistekist að sjá fyrir hrun bankanna og þau beri þar öll sameiginlega ábyrgð.  Sjálfur hafi Wellink viðurkennt í yfirheyrslunum að eftirlit þeirra með erlendum bönkum, með útibú í Hollandi, hafi ekki verið mikið.

„Kannski myndu dómstólarnir, sem Ísland var meinað að fara með málið fyrir, ekki fallast á slíka túlkun á umræddum tilskipunum ESB.“

Frakkar vildu ekki Icesave – Í hvaða heimi vinnur Wellink?

Þá víkur Björgvin að ummælum Wellinks að hann hafi fengið óljós svör frá Íslendingum þegar spurt var hvort íslensk stjórnvöld myndu ábyrgjast Icesave-innstæðurnar. Við yfirheyrslurnar sagi Wellink að formlegt svar íslenskra stjórnvalda hefði verið nei, en sagt hefði hollenski seðlabankinn metið það sem já.

„Metur hollenski seðlabankinn „formleg“ svör lítils vegna þess að í „raunveruleikanum“ gætu þau verið öðruvísi?“ spyr Björgvin af þessu tilefni. „Maður gæti spurt sig í hvaða heimi hr. Wellink rekur sinn banka. Staðreyndin er sú að Íslenski tryggingainnstæðusjóðurinn hafði ekki og hefur ekki enn nægilega getu til að standa undir Icesave-skuldbindingunum. Það var formlega svarið sem hollenski seðlabankinn fékk þá og þótt þyngdaraflið hafi yfirgefið stjórnendur hans, þá yfirgaf það ekki franska kollega þeirra,“ skrifar Björgvin og minnir á að Frakkar hafi haft sömu gögn í höndunum og Hollendingar, en einfaldlega ekki leyft Landsbankanum að opna þar Icesave-reikninga.

Sameiginleg ábyrgð vinaþjóða

Björgvin segist þó hafa samúð með stöðu Willinks, þar sem hann hafi viðurkennt að leyfi hollenska seðlabankans á starfsemi Icesave-reikninganna í Hollandi hafi verið röng ákvörðun.

„Sú ákvörðun hans mun engu að síður verða þungbær fyrir hollenska skattgreiðendur – og mögulega óvinnandi fyrir íslenska skattgreiðendur. Ásakanir um lygar og meðvitaðan blekkingarleik veita kannski tímabundna huggun, en ólíklegt er að þannig náist framtíðarlausn.

Þvert á móti, þá kallar þessi óheppilega staða á sameiginlega ábyrgð í anda tveggja vinaþjóða sem verið hafa bandamenn um langan aldur,“ skrifar Björgvin G. Sigurðsson í de Volkskrant.