Steingrímur: Tíminn að renna út. Reynt til þrautar að ná samningum fyrir helgi

Steingrímur J. Sigfússon, fjármálaráðherra, segir að reynt verði til þrautar næstu sólarhringana að ná samningum við Breta og Hollendinga vegna Icesave-skuldbindinganna.

Í viðtali við morgunútvarp Rásar 2 í morgun sagði hann að tíminn væri að renna út og þú yrði reynt til þrautar.

„Það er á meðan er, það er verið að reyna að láta á það reyna hvort ekki sé viðræðugrundvöllur til að ljúka málinu. Það er ákaflega mikilvægt að það takist. Við höfum í raun og veru ekki nema þessa klukkutíma og sólarhringa fram að helgi til að láta á þetta reyna,“ sagði Steingrímur.

Enginn vandræðagangur vegna ESB

Þá var hann spurður hvort ekki væri vandræðalegt fyrir hans flokk, Vinstri græna, að vera í ríkisstjórn sem fari í aðildarviðræður við Evrópusambandið. Hann taldi ekki svo vera. Um þetta hefði einfaldlega verið samið í stjórnarsáttmála og því ekkert sem ætti að koma fólki á óvart núna. Þá teldi mikill meirihluti þingmanna VG það einfaldlega lýðræðislegt að leyfa þjóðinni að kjósa um aðildarsamning þegar hann liggi á borðinu. Við það verði staðið.