Brottfluttir Íslendingar leita sér sálgæslu- aðstoðar erlendis í ríkum mæli

Miðbær Osló. Þar er erfiðara að fá störf en úti á landi í Noregi

Þeir Íslendingar sem flutt hafa búferlum til Noregs á undanförnum misserum leita í vaxandi mæli sálgæsluaðstoðar hjá presti Íslenska safnaðarins í landinu. Ástæðurnar eru að margir eru að flytja eingöngu út af fjárhagsvandræðum hérlendis sem bætast við áhyggjur vegna nýrra aðstæðna, tungumáls og nýrrar vinnu.

Eru um fimm þúsund Íslendingar nú búsettir í Noregi samkvæmt tölum þarlendrar Hagstofu og hafa aðeins á þessu ári rúmlega 800 manns bæst í þann hóp samkvæmt Fréttablaðinu.

Fólkið virðist mikið leita á náðir kirkjunnar og þá sérstaklega vegna sálgæslu að sögn Örnu Grétarsdóttur prests safnaðarins. „Það er leitað mikið til mín og það hefur verið gríðarleg aukning í sálgæslu. Það orsakast kannski af því að fólk er margt að flytja úr erfiðleikum og basli og við það bætast búferlaflutningar, nýtt tungumál, ný vinna og breyttar aðstæður.“