Viðskipti Laugardagur 04.12.2010 - 16:35 - Ummæli ()

Jóhanna: Samfylkingin gekk of mikið inn í venjur Sjálfstæðis- flokksins

Jóhanna segir Samfylkinguna biðja þjóðina afsökunar.

Jóhanna Sigurðardóttir, formaður Samfylkingarinnar, segir flokkinn verða að biðja þjóðina afsökunar á þeim mistökum sem gerð voru í stjórnarsamstarfinu við Sjálfstæðisflokkinn. Þetta kom fram í ræðu Jóhönnu á flokksstjórnarfundi Samfylkinginnar sem fór fram á hótel Loftleiðum í dag og greint var frá í fréttum Ríkisútvarpsins.

Jóhanna segir Samfylkinguna verða að axla ábyrgð á fortíðinni og viðurkenna að hún var ekki fórnarlamb heldur gerandi. Samfylkining hefði getað gert betur. Samfylkingin hafi ekki verið fórnarlamb óheillaþróunar á þessu tímabili.

Jóhanna segir Samfylkinguna axla ábyrgð sína með heiðarlegu uppgjöri við fortíðina, uppstokkun á starfsháttum og áherslum og kraftmikul endurreisnarstarfi á vettvangi flokks og samfélags. Jóhanna sagði Samfylkinguna ekki hafa nýtt tækifærin og gengið of mikið inn í venjur Sjálfstæðisflokksins í ríkisstjórnarsamstarfinu.

Jóhanna Sigurðardóttir sagði Samfylkinguna hafa staðið að margvíslegum breytingum á vinnubrögðum innan stjórnarráðsins og skaut föstum skotum þegar hún rifjaði upp breytingar á lögum um Seðlabankann.

Samfylkingin viðurkennir ábyrgð sína

Í skýrslu umbótanefndar Samfylkingarinnar, sem kynnt var í dag, segir að ábyrgð flokksins hafi m.a. falist í:

„• Að taka ekki nægilegt mark á viðvörunarorðum um veika stöðu bankakerfisins.
• Að vinna ekki nægilega markvisst að því að greina stöðu bankanna og undirbúa aðgerðir til draga úr óhjákvæmilegu tjóni vegna veikrar stöðu þeirra.
• Að tryggja ekki gegnum skýrt skipulag flokksins að nægilegt upplýsingastreymi og samráð sé á hverjum tíma meðal ráðherra flokksins, þingflokks, flokksstofnana og almennra flokksmanna.
• Að setja ekki ríkisstjórnarsamstarfinu nægilega ströng skilyrði um nauðsynlegar aðgerðir.
• Að láta hjá líða að setja reglur um takmarkanir á fjárframlögum og styrkjum til frambjóðenda í fjölda opinna prófkjara, þvert á langvinna baráttu flokksins fyrir skýrum reglum um fjármál stjórnmálaflokka og frambjóðenda.
Samfylkingin viðurkennir ábyrgð sína í þessum efnum. Biður hún íslensku þjóðina afsökunar á þeim mistökum sem hún ber ábyrgð á í aðdraganda hrunsins. Jafnframt heitir Samfylkingin því að hlusta með opnum hug á gagnrýni og takast á við umbætur á skipulagi, starfsháttum og stefnu flokksins til að koma í veg fyrir að sambærileg mistök endurtaki sig.“

«
»

Ummæli ()

Birta

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Eyjan - Smáratorgi 3, Kópavogi - eyjan@eyjan.is