WikiLeaks-uppljóstrari segir fyrstu gögnin hafa verið tengd Íslandi

Bradley Manning er aðeins 23ja ára, en á yfir höfði sér allt að 52já ára fangelsisdóm.

Svo virðist sem fyrstu gögnin sem uppljóstrarinn Bradley Manning sendi til WikiLeaks hafi verið tengd Íslandi. Þetta kemur fram neðanmáls í ítarlegri frásögn The Guardian af hátterni Mannings og því hvernig það vildi til að hann afritaði um 250 þúsund skjöl bandarískra stjórnvalda og kom þeim áfram til Julians Assanges hjá WikiLeaks.

Bradley Manning verður leiddur fyrir herdómstól og á hann yfir höfði sér 52ja ára fangelsisdóm. Hann hefur verið gagnrýndur harkalega af bandarískum stjórnvöldum, en ýmsir þingmenn repúblikana hafa jafnvel kallað lekann hryðjuverk gegn Bandaríkjunum.

Þegar hafa verið stofnuð samtök til varnar Bradley Manning, en þau telja hann hafa afhjúpað stríðsglæpi og að slíkt sé ekki glæpur.

Fékk fullan aðgang að trúnaðargögnum

Manning féll úr skóla á fyrri árum, en gekk þá í herinn. Hann svo sendur til Íraks, en þar segist hann hafa haft fullan aðgang að trúnaðarskjölum Bandaríkjastjórnar 14 tíma á dag, alla daga vikunnar í meira en átta mánuði samfleytt. Þar segist hann hafa uppgötvað hve yfirþyrmandi umfangsmiklar njósnir Bandaríkjastjórnar voru og varð hann jafnframt hneykslaður hvernig sum gögn lýstu vafasömu framferði innan hersins.

„Ég vil að fólk fái að sjá sannleikann, enda eru upplýsingar forsenda þess að almenningur geti tekið upplýstar ákvarðanir í málum,“ sagði hann í netspjalli við kollega sinn, Adrian Lamo, í maí síðastliðnum, en Lamo átti síðar eftir að tilkynna háttsemi Mannings til yfirvalda hersins.

Í spjallinu sagði hann jafnframt frá kynnum sínum af Julian Assange, forsprakka WikiLeaks, sem hafi ávallt verið mjög fjarrænn. Þannig hafi það tekið hann fjóra mánuði að átta sig á því að hann væri raunverulega að ræða við Assange. Lamo spurði Manning hvernig hann hefði haft samband við Assange, en svaraði því þannig að dæmið sneri á hinn veginn – að Assange hefði haft samband við hann. Þó gat hann þess að Assange hefði notað dulkóðað spjall-forrit.

Í greininni kemur fram að Manning hafi farið í frí til Bandaríkjanna í janúar á þessu ári. Skömmu eftir að hann sneri aftur til Íraks sendi hann svo fyrstu skjölin til WikiLeaks. Um var að ræða trúnaðarskjöl bandarískra diplómata um Ísland, en ekki segir í greininni hvort um sé að ræða sömu skjöl og birst hafa síðustu daga eða jafnvel einhver önnur.

Nokkrum vikum síðar hafði Manning svo sent öll 250 þúsund skjölin til WikiLeaks og hefur vefsíðan tekið sér nokkra mánuði til undirbúa birtingu gagnanna.