Síminn kærður til lögreglu fyrir ólöglega söfnun persónuupplýsinga

Söfnuðu persónuupplýsingum um viðskiptavini samkeppnisaðila.

Persónuvernd hefur kært fjarskiptafyrirtækið Símann til lögreglu fyrir ólöglega söfnun persónuupplýsinga frá viðskipavinum samkeppnisaðila, þar á meðal upplýsingum um símanotkun, svo sem fjölda og lengd símtala, ásamt nöfnum, kennitölum og starfsheitum. Upplýsingum var safnað með því markmiði að ná stórum viðskiptavinum annarra fyrirtækja í viðskipti hjá Símanum.

Upphaf málsins má rekja til rannsóknar Samkeppniseftirlitsins af tilefni kvörtunar Nova yfir því að Síminn hf. beindi sérstökum tilboðum til þeirra viðskiptavina Nova sem töldust til stórnotenda. Í bráðabirgðaúrskurði Samkeppniseftirlitsins vegna þeirrar kvörtunnar segir m.a: „Upplýsinga um umrædda stórnotendur hjá Nova kveðst Síminn hafa aflað með því að nýta sér svokallaðar CDR-færslur sem verða til miðlægt í símstöð. Þessar upplýsingar hafi verið notaðar af smásölu Símans til þess að finna úr hvaða símanúmerum hafi mest verið hringt í viðskiptavini Símans. Þær upplýsingar hafi síðan verið keyrðar saman við gagnagrunn www.ja.is og þannig útbúnir listar.“

Frá Samkeppnisstofnun barst málið til Póst og fjarskiptastofnunnar. Í úrskurði hennar um málið má meðal annars lesa: „Gögn málsins gefa til kynna að Síminn hafi gripið til umfangsmikilla markaðsaðgerða sem beindust að öðrum fjarskiptafyrirtækjum. Tilgangurinn var markvisst sá að ná frá félögunum mikilvægum viðskiptavinum með óeðlilegri notkun á trúnaðarupplýsingum sem ekki ber að nota í markaðslegum tilgangi. Síminn hefur viðurkennt að umrædd notkun á framangreindum upplýsingum hafi ekki verið lögum samkvæmt.“

Frá Póst og fjarskiptastofnun barst málið til Persónuverndar. Í niðurstöðu Persónuverndar um málið segir: „Sú aðgerð Símans hf. að nota samtengiupplýsingar um aðra viðskiptavini en sína eigin, og samkeyra þær við aðrar skrár til að búa til lista til nota í markaðslegum og fjárhagslegum tilgangi, var heimildarlaus og braut gegn ákvæðum laga nr. 77/2000 og verður, í ljósi umfangs brots og alvarleika þess, kærð til lögreglu.“

Í yfirlýsingu sem Síminn sendi frá sér vegna málsins í morgun segir:

Síminn hefur í kjölfar þessa máls farið rækilega yfir alla verkferla innan fyrirtækisins til að tryggja að atvik af þessu tagi endurtaki sig ekki.

Síminn hefur viðurkennt að hafa nýtt fjarskiptaumferðarupplýsingar í markaðslegum tilgangi og hefur unnið með eftirlitsstofnunum að því að upplýsa málið frá því það kom upp. Síminn harmar að hafa nýtt fjarskiptaumferðarupplýsingar með þeim hætti sem gert var.