20 ár liðin frá sjálfstæðisyfirlýsingu Litháen

Össur Skarphéðinsson utanríkisráðherra afhjúpaði í gær minningarskjöld í Vilníus, höfuðborg Litháens, um viðurkenningu Alþingis á sjálfstæði landsins.

“Til Íslands, sem óttalaust viðurkenndi lýðveldið Litháen, fyrst allra ríkja þann 11. febrúar 1991”, segir á skildinum, sem utanríkisráðherra afhjúpaði ásamt Audronius Azubalis utanríkisráðherra Litháen í viðurvist Vytautas Landsbergis fv. forseta litháíska þingsins og margra annarra sem leiddu sjálfstæðisbaráttu Litháens í upphafi tíunda áratugarins.

Í ávarpi við athöfnina sem fór fram við Íslandsstræti í miðborg Vilnius, lýsti ráðherra stolti Íslendinga yfir að hafa getað lagt sitt lóð á vogarskálarnar í sjálfstæðisbaráttu Litháa og lagði áherslu á að vináttuböndin sem voru bundin fyrir 20 árum væru enn afar traust.