Bein útsending í sjónvarpi frá fundi þingnefnda með seðlabankastjóra

Már Guðmundsson verður í þriggja tíma beinni sjónvarpsútsendingu á föstudag.

Afráðið hefur verið að hafa beina sjónvarpsútsendingu frá fundi þriggja þingnefnda með Má Guðmundssyni seðlabankastjóra næstkomandi föstudag.

Það eru efnahags- og skattanefnd, viðskiptanefnd og fjárlaganefnd sem sameinast um þennan fund með seðlabankastjóra, en í þeim sitja alls hátt í þrjátíu manns. Gert er ráð fyrir að fundurinn standi í þrjár klukkustundir, svo að gott skipulag þarf til að allir nefndarmenn fái sama tækifæri til að ræða við seðlabankastjóra.

Það er tiltölulega fátítt að nefndarfundir alþingis séu í beinni útsendingu. Fyrstu tilburðir í þá veru vöktu litla athygli enda þóttu aðstæður allar frekar frumstæðar og ekki bjóða upp á áhugavert sjónvarpsefni.

Samkvæmt upplýsingum Eyjunnar stendur til að gera betur núna enda hafa eflaust margir áhuga á þriggja tíma efnisríku samtali helmings þingheims við seðlabankastjóra.

Útsendingin hefst á alþingisrásinni klukkan tíu á föstudagsmorgun.