Ef Alþingi skipar stjórnlagaráð, líkt og lagt er til, virðir þingið  ekki þrískiptingu ríkisvaldsins og gengur inn á svið dómsvaldsins í landinu.

Þetta segir í grein Sigurðar Líndals, lagaprófessors, í Fréttablaðinu í dag.

Sigurður rifjar upp að samkvæmt lögum um stjórnlagaþing skal Hæstiréttur skera úr um gildi kosninga fulltrúa á þingið.

„Þetta gerði Hæstiréttur með ákvörðun 25. janúar 2011 og lýsti kosningu til stjórnlagaþings 27. nóvember 2010 ógilda. Ákvörðun Hæstaréttar verður ekki hnekkt og með lagasetningu sinni fól Alþingi æðsta handhafa dómsvaldsins endanlegt úrskurðarvald Ákvörðun Hæstaréttar er því í reynd hæstaréttardómur eða að minnsta kosti ígildi slíks dóms,“ skrifar Sigurður.

Fram hefur komið að fyrir þinginu liggur tillaga um að skipa 25 manna stjórnlagaráð í stað stjórnlagaþingsins og er ætlunin að þeir sem urðu efstir í hinni ógildu kosningu skipi stjórnlagaráðið. Sigurður bendir á að þar sem kosningin var úrskurðuð ógild er þessi 25 manna hópur umboðslaus og varar hann eindregið við skipan stjórnlagaráðsins.

„Með þessu er Alþingi í reynd að fella ákvörðun Hæstaréttar úr gildi og ganga inn á svið dómsvaldsins. Jafnframt virðir Alþingi ekki þrískiptingu ríkisvaldsins og brýtur þannig gegn stjórnarskránni, eða að minnsta kosti sniðgengur hana. Um leið ómerkir þingið eigin ákvörðun um að fela Hæstarétti endanlegt ákvörðunarvald.“

Sigurður segir engu breyta þótt einhverjar málamyndabreytingar séu gerðar á hlutverki stjórnlagaráðs frá því sem ákveðið var um stjórnlagaþing.

Hann varar 25-menningana við því að taka sæti í stjórnlagaráðinu og hefur þetta að segja um þessi vinnubrögð Alþingis:

„Það má svo sem segja að þetta sé í samræmi við það sem nú tíðkast í umgengni við lög og reglur, jafnt í stjórnmálum sem atvinnulífi.

En gott væri að þeir sem hyggjast taka sæti í stjórnlagaráði hugleiddu stöðu sína og þá jafnframt hvort þetta sé gæfuleg byrjun á því að setja nýja stjórnarskrá.“