Davíð sýnir Bjarna Ben gula spjaldið: Verður að nýta næsta tækifæri rétt

Davíð varar Bjarna við í leiðara Morgunblaðsins í dag. Segir að hann fái kannski annað tækifæri, en hann verði að nýta það tækifæri vel.

Davíð Oddsson skýtur viðvörunarskotum á Bjarna Benediktsson og aðra forystumenn Sjálfstæðisflokksins, í leiðara Morgunblaðsins í dag. Þar gagnrýnir hann þingmenn og forystu flokksins harðlega fyrir að hafa stutt Icesave-samningana á Alþingi og fyrir þjóðaratkvæðagreiðsluna. Þá ítrekar Davíð að halda beri landsfund á þessu ári, en til hans hefur ekki verið boðað.

Davíð telur að forysta flokksins eigi aðeins tvo kosti: “Tilkynna að hún muni fara frá á næsta Landsfundi flokksins, sem ber að halda á þessu ári, ellegar leitast við að endurvinna það traust sem glataðist og fá endurnýjað umboð á fundinum.”

Þá segir hann að forysta flokksins og meirihluti þingflokksins hafi “ekki náð að skýra með sannfærandi hætti hvers vegna hún ákvað að fylgja leiðsögn Jóhönnu og Steingríms í hinu afdrifaríka máli. Bersýnilega las hún ekki rétt hug sinna eigin flokksmanna og virti ekki skýra ályktun þeirra og afstöðu. Af því leiðir að flokksmenn ræða sín á milli hvort hætta sé á að forystan kunni að bregðast með áþekkum hætti í öðrum stórmálum. Þarna liggur trúnaðarbresturinn.”

Davíð segist túlka orð Bjarna, um að hann ætli að vinna traust flokksmanna á ný, með þeim hætti að hann ætli  “ekki að berja höfðinu við steininn heldur viðurkenna mistökin í verki“ og að „læra af því sem gerðist.“ Þá telur Davíð að flokksforystan muni „ekki vinna trúnað flokksfólks á ný eins og hendi sé veifað“, en að hún muni hugsanlega fá „annað tækifæri. Sé það mat rétt verður hún að nýta það tækifæri vel. Annað mun örugglega ekki gefast.“