Tæplega 1.700 tómar íbúðir en Samtök iðnaðarins vilja byggja meira

Samtök iðnaðarins telja tilefni til að byggja fleiri íbúðir á höfuðborgarsvæðinu

Byggja þarf fleiri íbúðir á höfuðborgarsvæðinu að mati Samtaka iðnaðarins þrátt fyrir að nýleg talning sýni að tæplega 1.700 íbúðir standi tómar. Benda samtökin á að stórir hópar ungs fólks sé að koma inn á fasteignamarkaðinn og þessi fjöldi dugi skammt.

Til þess að það gangi eftir þurfa þó sveitarfélög að lækka gjöld sín hið fyrsta til að koma byggingamarkaðnum af stað á ný að því er fram kemur í máli talsmanna Samtaka iðnaðarins við Morgunblaðið.

Hafa samtökin nýlega lokið við talningu tómra íbúða víða um landið en slíka könnun hafa þau gert áður og síðast í fyrra. Þá reyndust tómar íbúðir á höfuðborgarsvæðinu vera um tvö þúsund talsins og hefur því fækkað um 300 milli ára. Það segja samtökin skýrt merki um nauðsyn þess að byggja meira og þá sérstaklega minni íbúðir.