Um helmingur forrita í íslenskum tölvum er stolinn

Um helmingur alls hugbúnaðar sem er uppsettur á tölvum hér á landi er fenginn eftir ólöglegum leiðum. Það er svipað hlutfall og síðustu fimm ár og er meðal þess mesta sem gerist í Vestur-Evrópu.

Þetta og fleira kemur fram í nýútgefinni skýrslu Business Software Alliance (BSA), alþjóðlegra samtaka hugbúnaðarframleiðenda sem hafa innan sinna vébanda mörg stærstu fyrirtæki heims á þessu sviði, þar á meðal Microsoft og Adobe. Fréttablaðið greinir frá.

Meðal þess sem þar kemur fram er að sjö prósentustiga aukning hefur orðið í notkun á ólöglegum hugbúnaði á heimsvísu frá árinu 2006. Þá var hlutfall ólöglegs hugbúnaðar í tölvum 35 prósent, en í fyrra var hlutfallið 42 prósent.

Hæst hlutfall ólöglegs hugbúnaðar mældist í Georgíu, 93 prósent, en lægst var það í Bandaríkjunum, Japan og Lúxemborg, 20 prósent.

Friðrik J. Skúlason, tölvunarfræðingur og forritari, segir í samtali við Fréttablaðið að þessar tölur komi sér ekki á óvart.

„Það eru allt of margir sem alast upp við það að það sé ekki þjófnaður að taka verk annarra í heimildarleysi. Það er ákveðinn hluti fólks sem stelur aldrei og ákveðinn hluti sem finnst það eðlilegt að stela. Hinir á milli kaupa efni löglega þegar þeir geta. Ef aðstæður hér á landi breytast þannig að auðveldara verður að ná sér í höfundarvarið efni á löglegan hátt, ætti það að draga úr stuldinum. Þá hefur fólk ekki þá afsökun að geta ekki keypt og verði því að stela, sem er afskaplega hallærisleg afsökun,“ segir Friðrik.