Sætu litlu kópunum í Húsdýragarðinum lógað á haustin

Urta með nýkæptan kóp sinn í Fjölskyldu- og húsdýragarðinum. Kópunum er flestum lógað efti sumarið

„Staðreyndin er sú að ef við gerðum ekki neitt þá væri þetta selagarður en ekki fjölskyldu- og húsdýragarður,“ segir Þorkell Heiðarsson, sjávarlíffræðingur hjá Fjölskyldu- og húsdýragarðinum, við Eyjuna.

Árlega fæða urtur í garðinum allt að þremur kópum en plássskortur gerir það að verkum að lóga verður kópunum velflestum á haustin.

Þykir reyndar afar sérstakt hversu vel urtum í garðinum gengur að kæpa því reyndin er önnur víða erlendis þar sem það er undantekning fremur en regla að urtur kæpi í sædýrasöfnum.

Í Fjölskyldu- og húsdýragarðinum er selalaugin ekki nógu stór til að hægt sé með góðu móti að bæta við selum og því verða forráðamenn að lóga kópum á haustin. Ekki er úrræði að sleppa þeim lausum út í náttúruna að sögn Þorkels því ekki aðeins er um smithættu að ræða heldur líka kunna kóparnir ekkert að veiða sér til matar eftir að hafa alist upp í sædýrasafni.

Alls hafa milli 50 og 60 kópar fæðst í garðinum frá því hann opnaði og eru þeir svæfðir af dýralækni á haustin.