Jón ákvað á eigin spýtur og gegn tillögu að setja verðtolla á innflutning

Jón Bjarnason fór gegn ráðgjöf sérstakrar nefndar þegar hann ákvað breytta tolla

Jón Bjarnason, landbúnaðar- og sjávarútvegsráðherra, ákvað upp á sitt einsdæmi og gegn áliti ráðgjafanefndar að úthluta tollum á landbúnaðarvörum samkvæmt verði en ekki magni. Sú aðgerð snarhækkaði alla tolla á innfluttar landbúnaðarvörur.

Birti ráðherrann loks í morgun, heilum mánuði eftir að umboðsmaður Alþingis taldi að ákvörðun Jóns bryti í bága við stjórnarskrá, yfirlýsingu um málið sem vakið hefur talsverða úlfúð meðal verslunarmanna.

Tekur Jón þar alla ábyrgð á að hafa breytt tollum á þann veg að miðað var við verð en ekki magn eins og raunin hefur verið síðustu árin. Ástæður þessa fæðuöryggi landans, gjaldeyrishöftin og ástandið í atvinnumálum.

Tilkynning ráðherrans í heild sinni:

Yfirlýsing ráðherra um tollamál

Jón Bjarnason sjávarútvegs- og landbúnaðarráðherra vill af gefnu tilefni koma á framfæri vegna umræðu um álit umboðsmanns Alþingis um úthlutun tollkvóta í landbúnaði.:

Eins og fram kom á fundi með efnahags- og viðskiptanefnd Alþingis í morgun kom tillaga um að breyta útreikningi tollkvóta úr svokölluðum magntolli í verðtoll ekki frá ráðgjafanefnd stjórnarráðsins um tollamál.

Ákvörðun um þessa breytingu var tekin af undirrituðum í ljósi þeirra aðstæðna sem hér sköpuðust við bankahrun haustið 2008. Hún tekur mið af gjaldeyrishöftum sem í gildi eru, ástandi í atvinnumálum og fæðuöryggi landsmanna.

Ákvörðunin var tekin í samræmi við samstarfsyfirlýsingu stjórnarflokkanna um að standa vörð um innlenda framleiðslu og störf í matvælaiðnaði.

Sjávarútvegs- og landbúnaðarráðuneyti 22. ágúst 2011

Jón Bjarnason