Hreyfingin vill stokka upp kvótakerfið og miða úthlutun við árið 1991. Sveitarfélög ein megi selja kvóta.

Þingmenn Hreyfingarinnar hafa lagt lagafrumvarp fyrir Alþingi þar sem gert er ráð fyrir að aflaheimildum verði endurúthlutað og þær afhentar sveitarfélögum sem skuli selja kvótann á uppboði.

Sveitarfélögin fái einkarétt á sölu og framsali aflaheimilda.

Hlutur hvers sveitarfélags í hinum endurúthlutuðu aflaheimildum á að miðast við hlutfall sveitarfélagsins í aflaheimildum áranna 1990 og 1991 en þá tóku fyrst gildi lög sem heimiluðu framsal aflaheimilda. Með þessu frumvarpi yrði þurrkuð út sú þróun sem síðan hefur orðið með tilfærslu kvóta milli byggðalaga og landshluta.

Frumvarpið kveður á um að sveitarfélögunum verði gert skylt að selja kvóta sinn áfram til útgerða á opinberum uppboðum.

Þó megi gera  samninga til fimm ára um allt að helming kvóta hvers sveitarfélags við þær útgerðir á staðnum, sem fjárfest hafa í nýjum skipum.

Þeir samningar séu óframseljanlegir og eigi verð þess kvóta sem þar er samið um að miðast við meðalverð á kvótauppboðunum.

Þá er í frumvarpinu svohljóðandi ákvæði:

„Selji sveitarfélag aflaheimildir til einstaklinga eða lögaðila sem eiga lögheimili utan þess skulu kaupendur greiða sveitarfélaginu 10% álag á uppboðsverð.

Öðrum en sveitarfélögum eða uppboðsmörkuðum á vegum sveitarfélaga er óheimil sala eða framsal aflaheimilda.“

Með frumvarpinu eru birtar töflur yfir tilfærslu á aflaheimildum til sveitarfélaga, frá því sem var fiskveiðiárið 1990-1991, en það ár tóku lög um framsal aflaheimilda gildi, eins og fyrr sagði.

Þar kemur til dæmis fram að árið 1991 voru tæp 8% af úthlutuðum þorskígildistonnum skráð í Reykjavík en hlutfallið var orðið 14,5% fiskveiðárið 2010-2011, sem þýðir að hlutur Reykjavíkur í kvótanum hefur aukist um 87% frá því að framsal varð leyfilegt.

Í Reykjanesbæ voru hins vegar tæp 4% af úthlutuðum þorskígildistonnum skráð árið 1990 en aðeins tæplega 1% á fiskveiðiárinu 201ö-2011. Hlutur Reykjanesbæjar í kvótanum hefur því rýrnað um 74% á tímabilinu.

Þá hefur kvóti sveitarfélaganna sem nú nefnast Fjarðarbyggð rýrnað úr 7,20% í 4,02% frá 1991-2010 en kvóti Ísafjarðarbæjar farið úr 6,71% í 5,19%.

Ísfirðingar fengju um 5.000 tonn í viðbótarkvóta samkvæmt því fyrirkomulagi sem frumvarpið teiknar upp en hlutur sveitarfélagsins Fjarðarbyggðar ykist um tæp 10.000 tonn.

Reykvíkingar myndu hins vegar missa um helming, eða um 20.000 tonn, af kvóta síðasta fiskveiðiárs ef frumvarp Hreyfingarinnar verður að lögum.

Nánar er hægt að skoða frumvarpið og talnaefni með því hér.