Rannsóknir á Drekasvæðinu gefa jákvæðari niðurstöður en búist var við

Fyrstu niðurstöður af Drekasvæðinu gefa jákvæðari niðurstöður en menn þorðu að vona að olíu sé þar að finna í vinnanlegu magni

Samkvæmt niðurstöðum nýrra rannsókna sem gerðar voru á hafsbotninum suður af Jan Mayen og náði að hluta til inn á íslenska Drekasvæðið telja menn nú auknar vonir á að svæðið gefi olíu í vinnanlegu magni.

Fréttablaðið segir frá þessu en skýrt er frá rannsóknum þessum á vef norsku Olíumálastofnunarinnar. Kemur þar fram að umræddar rannsóknir hafi verið unnar í samvinnu við Orkustofnun hérlendis og að hluta til náð inn á Drekasvæðið.

Niðurstöður þessara rannsókna, sem fram fóru síðasta sumar, eru sagðar spennandi og fyrst og fremst vegna þess að bergið á þessum slóðum sé 260 milljón ára gamalt og í því séu setlög sem Norðmennirnir segja að gefi góðar vísbendingar um að þarna sé olíu að finna. Hafi niðurstöðurnar verið mun jákvæðari en Norðmenn sjálfir hafi búist við.