Meirihluti segir koma til greina að kjósa Ólaf Ragnar Grímsson áfram forseta

Tæplega 54 prósent kjósa Ólaf Ragnar áfram forseta Íslands næsta kjörtímabil

Samkvæmt nýrri könnun gætu 53,7 prósent hugsað sér að kjósa Ólaf Ragnar Grímsson, forseta Íslands, á nýjan leik til næstu fjögurra ára, gæfi hann kost á sér í næstu forsetakosningum.

MMR gerði könnun á þessu meðal þjóðarinnar fyrir Viðskiptablaðið.

Í ljós kemur að af þeim sem taka afstöðu er meirihluti, 53,7,  sem segir koma til greina að kjósa Ólaf Ragnar til fjögurra ára enn, en forsetakosningar fara fram á næsta ári. Að sama skapi segja 46,3 prósent svarenda ekki koma til greina að kjósa Ólaf.

Fylgi við Ólaf mælist meira hjá yngstu kjósendunum en öðrum. Meðal fólks á aldrinum 18- 29 ára segja 70,8 prósent koma til greina að kjósa hann. Þá er landsbyggðarfólk líklegra til að kjósa Ólaf Ragnar en fólk á höfuðborgarsvæðinu. Fylgi hans á höfuðborgarsvæðinu mælist 48,2 prósent, en 62,1 prósent á landinu öllu.

Þá nýtur Ólafur mests stuðnings meðal stuðningsmanna Framsóknar, 85,1 prósent. Þá hefur hann 64,2 prósent fylgi meðal stuðningsmanna Sjálfstæðisflokksins.

Tæplega 900 tóku þátt í könnun MMR og tóku 75 prósent þeirra afstöðu.