Blæs á kenninguna að alþjóðleg bankakreppa hafi orsakað hrunið hérlendis

Sú kenning að hér hafi allt hrunið vegna alþjóðlegrar kreppu er fjarri sanni segir Þorvaldur Gylfason

„Sú kenning að íslensku erfiðleikarnir eigi rót sína að rekja til heimsvandans í bankamálum er fjarri öllum sanni,“ segir Þorvaldur Gylfason, prófessor í hagfræði.

Þar vísar prófessorinn til lífskjarakönnunar Hagstofu Íslands er sýnir glögglega að staða íslenskra heimila er töluvert verri en gengur og gerist á öðrum Norðurlöndum sem þó einnig þurfti að taka á alþjóðakreppunni eins og aðrar þjóðir.

Var það meðal annars viðkvæði Geirs Haarde, fyrrum forsætisráðherra, í frægu ávarpi þegar neyðarlögin voru sett að það væri alþjóðakreppan sem valdið hefði falli íslenska bankakerfisins.

Í viðtali við RÚV bendir Þorvaldur á að þau heimili hérlendis sem eiga í verulegum erfiðleikum með að ná endum saman um hver mánaðarmót séu mikið mun fleiri en gerist í nágrannalöndunum. Samkvæmt lífskjarakönnuninni eru sextán prósent íslenskra heimila í þeirri stöðu en í Svíþjóð, Danmörku, Finnlandi og Noregi eru aðeins á milli tvo og fjögur prósent þarlendra heimila í slíkum vanda.

Með öðrum orðum hefur alþjóðlega bankakreppan 2008 ekki orðið öðrum norrænum heimilum eins þungur baggi og raunin er hér.

Þorvaldur telur brýnt að ráðamenn bretti upp ermar og taki á ýmsum brýnum umbótamálum enda sé staðan alvarleg. „Við þurfum að taka á ýmsum umbótamálum sem hafa verið í deiglunni hér árum og áratugum saman en stjórnvöld hafa ekki enn viljað ráðast í. Ég er að tala um landbúnaðarmál, sjávarútvegsmál, ég er að tala um alla þessa gömlu góðkunningja í umræðunni um efnahagsmál langt aftur í tímann. Það verður að bretta upp ermarnar.“