Hvað verður um gögn landsdómsmálsins?

Felli Alþingi niður landsdómsmálið gegn Geir H. Haarde munu málsgögn saksóknara Alþingis líklega ekki koma fyrir sjónir almennings í langan tíma.

Ögmundur Jónasson innanríkisráðherra hefur tjáð Fréttablaðinu að hann telji að gögn sem fengist hafa til vinnslu við meðferð málsins séu þegar orðin opinber gögn en tjáir sig ekki nánar um hvað í því felist.

Þetta kemur fram í fréttaskýringu í Fréttablaðinu í dag þar sem kannað er hvað verði um málsgögnin sem aflað hefur verið við rannsóknina ef málið fellur niður. Gögn málsins eru í tíu heftum og nema alls 3.683 blaðsíðum. Skjalaskráin ein er 122 blaðsíður að lengd. Meðal gagnanna er tölvupóstur Geirs á tímabilinu frá 15. júní til 1. febrúar 2009 ásamt fundargerðum og minnisgreinum frá ráðherrafundum ríkisstjórna á sama tímabili. Einnig gögn forsætisráðuneytinu; frá rannsóknarnefnd Alþingis og Atlanefndinni svokölluðu.

Fréttalaðið telur öruggt að öll málsgögnin verði lokuð almenningi í áratugi falli málið niður. Í blaðinu segir að á það hafi verið bent að með því að draga ákæruna til baka væri Alþingi að bregðast fyrirheitum um rannsókn og uppgjör eftir hrun en með efnislegri meðferð málsins fyrir Landsdómi muni fást svör við fjölmörgum spurningum því í málinu komið fram mikið af gögnum um aðkomu stjórnmálamanna í aðdraganda hrunsins.

Fram kemur að Sigríður Friðjónsdóttir, saksóknari Alþingis, segi að gögnin séu að stofni til sömu gögn og rannsóknarnefnd Alþingis hafði undir höndum.

„Þetta yrði þá sakamál sem fellt væri niður og það þyrfti að skoða það hvort í gildi séu reglur um hvort aðgangur að þeim gögnum sé heimill eða hvort þau yrðu þá komin úr augsýn í ákveðinn tíma á grundvelli upplýsingalaga,“ segir Sigríður. „Ef þetta væri venjulegt mál fyrir Hæstarétti yrðu málsgögn hjá réttinum í ákveðinn tíma og svo færu þau á Þjóðskjalasafnið.“

Upplýsingalögin sem veita almenningi rétt til gagna í vörslum stjórnvalda ná eingöngu til stjórnsýslunnar en hvorki til gagna í vörslum dómstóla né Alþingis. Þau gögn tengd landsdómsmálinu, sem saksóknari Alþingis, hefur aflað sjálfstætt falla því ekki undir gildissvið upplýsingalaganna og verða aldrei gerð aðgengileg öðrum en aðilum málsins. Gögn sem rannsóknarnefnd Alþingis eru hins vegar háð upplýsingalögum samkvæmt sérstöku ákvæði í lögum um störf nefndarinnar sem heimila almennan aðgang að þeim að loknum 30 árum.