Stjórnarskrárfrumvarp talið allt of flókið til að kjósa um í þjóðaratkvæðagreiðslu

Hluti þeirra sem störfuðu í stjórnlagaráði og skiluðu drögum að nýrri stjórnarskrá landsins af sér í haust. Er frumvarpið of flókið til að senda í þjóðaratkvæðagreiðslu?

Ekki er talið árangursríkt að láta þjóðina kjósa um stjórnarskrárfrumvarp stjórnlagaráðs í þjóðaratkvæðagreiðslu samhliða forsetakosningum í sumar eins og vonir stjórnvalda standa til. Dósent við lagadeild Háskóla Íslands segir frumvarpið einfaldlega allt of viðamikið og flókið til þess.

Reyna íslensk stjórnvöld nú að ná því fram að kosið verði um tillögur stjórnlagaráðs að nýrri stjórnarskrá samhliða forsetakosningum í sumar. Formaður stjórnskipunar- og eftirlitsnefndar Alþingis hefur þegar lagt að frumvarpið í heild sinni yrði borið undir þjóðaratkvæði í sumar en þá með nokkrum afgerandi spurningum.

Sitt sýnist hverjum um það en Skúli Magnússon, dósent við HÍ og ritari EFTA dómstólsins, segir frumvarpið of fjölþætt og viðamikið til að hægt sé að fara fram á að fólk svari spurningum af sanngirni í slíkri þjóðaratkvæðagreiðslu.

Segir hann við Fréttablaðið óhjákvæmilegt að skilgreina helstu atriðin sem almenn samstaða sé um að þurfi eða megi breyta. Með þeim hætti megi taka létta yfirferð á stjórnarskránni og stilla upp í eina einustu breytingartillögu sem þjóðin aftur tæki svo afstöðu til.

Spurning sé þó hversu langt er hægt að ganga á þessum grundvelli en Skúli bendir á að þjóðin þurfi að fá að taka mun skýrari afstöðu til hluta á borð við eðli forsetaembættisins, breytinga á kjördæma- og kosningaskipan og svo framvegis. Ekki sé lýðræðislegt né skynsamlegt að ýta breytingum í gegn með þeim hætti sem nú lítur út fyrir að verði.