Traust fjárfesta á stjórnvöldum í lágmarki – Höftin við lýði næstu áratugi með þessu áframhaldi

Lítið traust í garð Seðlabanka Íslands og stjórnvalda leiðir til þess að fjárfestar sýna gjaldeyrisútboðum seðlabankans mun minni áhuga en vonir stóðu til. Sérfræðingur segir að með þessu áframhaldi verði gjaldeyrishöftin við lýði næstu áratugi.

Bloomberg fréttaveitan fjallar um nýafstaðin gjaldeyrisútboð seðlabankans sem þóttu nokkuð undir væntingum seðlabankans.

Í fyrra útboðinu bauðst bankinn til að kaupa evrur fyrir ríkisskuldabréf og íslenskar krónur. Bárust 79 tilboð að fjárhæð 92,9 milljóna evra og var tilboðum að fjárhæð 22,5 milljónum evra tekið fyrir 239 krónur fyrir hverja evru.

Í síðara útboðinu bauðst bankinn til að kaupa krónur fyrir evrur og alls bárust tilboð að fjárhæð 26,3 milljörðum króna og var tilboðum tekið fyrir 4,9 milljarða á genginu 235 krónur fyrir hverja evru.

Með þessu áframhaldi mun það taka seðlabankann áratugi að afnema gjaldeyrishöftin,

segir Andri Guðmundsson, framkvæmdastjóri HF verðbréfa í Reykjavík.

Á endanum mun seðlabankinn þurfa að breyta áætlun sinni.  Ein ástæðan fyrir því að fjárfestar taka ekki þátt í skuldabréfaútboðum seðlabankans er að þeir treysta ekki seðlabankanum og íslenskum stjórnvöldum.

Athygli vekur að í úboðinu féllst seðlabankinn á 235 krónu lágmarksverð fyrir hverja evru, sem er 40 prósentum lægra en opinbert gengi bankans sem er 168 krónur.

Seðlabankinnn vill helst að aflandsgengi krónunnar færist í áttina að opinbera genginu. En ef við horfum á þróunina undanfarið ár, þá er hið gagnstæða að gerast.

segir Andri. Þorgeir Eyjólfsson, verkefnstjóri hjá seðlabankanum við losun gjaldeyrishafta, segir fyrirkomulag skuldabréfaútgáfunnar alltaf til skoðunar. Svo gæti farið að fyrirkomulaginu verði að einhverju leyti breytt fyrir næsta útboð.