Útgjöld til þróunaraðstoðar: Ísland stendur nágrannaþjóðum langt að baki – Aðeins Grikkland og Spánn skáru meira niður

Útgjöld Íslands til þróunaraðstoðar, miðað við landsframleiðslu, hafa dregist all verulega saman.

Ísland stendur öðrum Norðurlandaþjóðum langt að baki í útgjöldum til þróunaraðstoðar, samkvæmt tölum OECD. Útgjöld Íslands til þróunarmála drógust saman um rúmlega 18 prósent milli áranna 2010 og 2011. Aðeins Grikkland og Spánn skáru meira niður.

Útgjöld til þróunarmála drógust saman um nærri 3 prósent á heimsvísu í fyrra og er þetta í fyrsta skipti síðan árið 1997 sem samdráttur verður á þessu sviði, að því er fram kemur í nýrri skýrslu OECD. Skuldakreppu meðal vestrænna ríkja er kennt um.

Angel Gurría, aðalritari OECD, lýsir yfir miklum áhyggjum af þessum samdrætti og hvetur OECD ríkin til að standa við skuldbindingar sínar, enda þörfin aldrei meiri en nú.

Ef rýnt er í tölurnar kemur í ljós að Ísland stendur nágrannaþjóðum sínum langt að baki í þessum málaflokki. Svíar veita mest allra þjóða í þróunaraðstoð, ef miðað er við hlutfall af landsframleiðslu, eða 1,02 prósent. Norðmenn eru ekki þar langt á eftir, en hlutfallið á þeim bænum er 1 prósent.

Þar á eftir koma Lúxemborg (0,99%), Danmörk (0,86%) og Holland (0,75%).

Alls vörðu Íslendingar 26 milljónum dollara til þróunarmála í fyrra, eða sem nemur 0,22 prósent af landsframleiðslu. Þetta hlutfall hefur minnkað frá árinu 2010, en þá nam hlutfallið 0,29 prósent. Alls hafa því útgjöld til þróunarmála dregist saman um 18,2 prósent, sé miðað við hlutfall af landsframleiðslu.

Aðeins á Spáni og í Grikklandi hafa útgjöld til þessa málaflokks dregist meira saman. Grikkir skáru niður um tæplega 40 prósent og Spánverjar um 32,7 prósent.

Bandaríkin leggja sem fyrr til langhæstu upphæðina til þróunarmála, eða 30 milljarða dollara. Það er þó ekki hlutfallslega hátt, því framlagið nemur 0,20 prósent af landsframleiðslu Bandaríkjanna.