Le Pen snýr aftur: Róttæka hægri konan kom mest á óvart – Eva Joly fær aðeins 2,3 prósent

Marine Le Pen, leiðtogi Front National. Mynd/Getty images.

Hin róttæka hægri kona Marine Le Pen kom allra frambjóðenda mest á óvart í fyrri umferð forsetakosninganna í Frakklandi í dag. Samkvæmt áreiðanlegum útgönguspám mælist hún með nærri 20 prósenta fylgi. Engu að síður verða það Francois Hollande og Nicolas Sarkozy sem halda áfram í næstu umferð.

Kjörsókn í Frakklandi var mun betri en búist var við, en tæplega 79 prósent kjósenda mættu á kjörstað.

Sósíalistinn Francois Hollande hlýtur samkvæmt útgönguspám 28,5 prósent atkvæða á meðan sitjandi forseti Nicolas Sarkozy fær 26 prósent. Þetta þýðir að að þessir tveir frambjóðendur mætast í síðari umferð kosninganna þann 6. maí.

Þótt fyrirfram var búist að það yrði raunin, er munurinn á milli þessara tveggja frambjóðenda mun minni en skoðanakannanir gáfu til kynna.

Íslandsvinurinn Eva Joly, sem býður sig fram fyrir Græningja, hlaut einungis 2,3 prósent samkvæmt þessu sömu tölum.

Flestum að óvörum hlaut Marine Le Pen, dóttir hins umdeilda Jean-Marie Le Pen, 19,6 prósent atkvæða. Hún skýtur föður sínum því ref fyrir rass, því hann fékk mest 16,9 prósent atkvæða árið 2002. Það nægði honum til að komast í aðra umferðina. Þau úrslit ollu miklum titringi meðal vinstri manna sem neyddust þá til að kjósa hægri manninn Jaques Chirac.

Le Pen hefur, líkt og faðir sinn, harða afstöðu í innflytjendamálum, auk þess sem hún vill að Frakkland yfirgefi evruna og taki aftur upp sinn gamla gjaldmiðil, frankann.

Fyrri umferðin er upphafið að mikilli liðssöfnun meðal hægri sinnaðra föðurlandsvina. Ekkert verður eins og það var áður,

sagði glaðbeitt Marie Le Pen við stuðningsmenn sína eftir að niðurstöður útgönguspánna lágu fyrir.

Þrátt fyrir að vera með minna fylgi en Hollande, gefa niðurstöðurnar Sarkozy byr undir báða vængi því að minnsta kosti helmingur kjósenda Le Pen ætlar að styðja við bakið á Sarkozy í síðari umferðinni. Enda tók Sarkozy sífellt harðari afstöðu gegn innflytjendum eftir því sem leið á kosningabaráttuna.

Það eru hins vegar efnahagsmálin sem valda Sarkozy vandræðum. Hagvöxtur er lítill og atvinnuleysi mikið. Það hjálpar honum þó að markaðir eru honum hliðhollir, því þeir óttast mjög skattahækkunaráform Hollandes.

Ef Sarkozy bíður ósigur verður hann 11. leiðtoginn á evrusvæðinu sem þarf að gjalda fyrir skuldavanda þess síðan í árslok 2009. Enn fremur yrði það í fyrsta sinn í 30 ár sem sitjandi forseti þarf að lúta í lægra haldi. Þá yrði Hollandes einungis annar vinstri maðurinn til að ná völdum í fimmta lýðveldinu sem komið var á laggirnar árið 1958.