21. öldin verður öld efnahagslegra og náttúrulegra hamfara

Framtíðarsýn Konunglega vísindafélagsins er svört.

21. öldin verður öld efnahagslegra og náttúrlegra hamfara ef íbúar í hinum vestræna heimi breyta ekki hegðunarmynstri sínu, segir í nýrri skýrslu. Einkaneysla þarf að minnka til muna og sporna þarf við gríðarlegri fólksfjölgun.

Þetta kemur fram í skýrslu Konunglega vísindafélagsins í London sem gefin var út í dag. Skýrslan hefur verið tæplega 2 ár í smíðum og stýrði líffræðingurinn og nóbelsverðlaunahafinn John Sulston gerð hennar.

Ekki er hægt að segja að niðurstöðurnar gefi tilefni til bjartsýni á framtíðina, því ein megin niðurstaða skýrslunnar er sú að heimurinn er engan veginn í stakk búinn til að takast á við þá öru fólksfjölgun sem framundan er. Áætlað er að árið 2050 verði íbúar heimsins orðnir fleiri en 9 milljarðar, en ekki er langt síðan þeir urðu 7 milljarðar. Viðbótin á þessum 38 árum jafngildir samanlagðri stærð Kína og Indlands.

Í skýrslunni eru stjórnmálamenn gagnrýndir fyrir að hafa ekki enn sett þessi fyrirhuguðu vandamál efst á stefnuskrá sína.

Fjöldi íbúa á þessari plánetu hefur aldrei verið meiri, neysla þeirra á sér engin fordæmi og miklar breytingar eru að verða á umhverfinu. Við getum tekið þá ákvörðun að dreifa björgum heimsins þannig að neyslumynstrið verði jafnara…eða við getum ákveðið að gera ekki neitt og sogast þannig inn í spíral efnahagslegra og náttúrulegra hamfara sem leiðir til ójafnari og óvistvænni framtíðar,

segir í skýrslunni. Helsta áhyggjuefni skýrsluhöfunda er ekki sú staðreynd ein og sér að jarðarbúum muni fjölga um 2,3 milljarða á næstu 40 árum eða svo, heldur hvernig við ætlum að fæða og klæða heimsbyggðina, enda fólksfjölgunin langmest í þróunarlöndunum.

Vestur-Afríkuríkið Níger er tekið sem dæmi. Auknar lífslíkur þar á undanförnum 30 árum hafa leitt til þess að íbúafjöldinn í landinu tvöfaldast á 20 ára fresti. Jafnvel þótt fæðingartíðnin verði komin niður í 3,9, eins og bjartsýnni spár gera ráð fyrir, verða íbúar landins orðnir 55,5 milljónir árið 2050. Þeir eru í dag 15 milljónir. Það gefur því augaleið að sífellt erfiðara verður að fæða íbúa landsins og sjá þeim fyrir grunnþjónustu á borð við heilsugæslu og menntun.

Þetta á við um fleiri lönd og vilja skýrsluhöfundar meina að grípa þurfi til allra mögulegra aðgerða til að sporna við þessari þróun. Þær fela meðal annars í sér að getnaðarvörnum verði dreift til allra kvenna sem þess óska og að stjórnvöld beiti sér fyrir því að einkaneysla almennings verði minnkuð umtalsvert frá því sem nú er.