1. maí ávarp Gylfa: Erum enn að glíma við sama vandann í atvinnumálum og eftir hrun

Atvinnumálin voru fyrirferðamikil í ávarpi Gylfa Arnbjörnssonar, forseta ASÍ.

„Við erum því enn að glíma við sama vandann í atvinnumálum og frá því skömmu eftir hrun. Hér hefur engin fjölgun orðið á störfum frá 1. ársfjórðungi 2009 til 1. ársfjórðungs 2012,“ sagði Gylfi Arnbjörnsson, forseti ASÍ, í 1. maí ávarpi sínu þar sem hann lagði áherslu á atvinnumál.

Í ávarpi sínu sagði Gylfi að ástandið á Íslandi hafi batnað töluvert nú þegar fjögur ár eru liðin frá hruni bankanna. Þó liggur greiðslu- og skuldavandi þungt á mörgum heimilum og jafnvel þótt margt hafi verið gert til að greiða úr þeim vanda, þá skipti mestu máli fyrir fólk í erfiðu árfreði að hafa vinnu.

Tæplega tólf þúsund Íslendingar eru í þeirri stöðu í dag að hafa ekki atvinnu. Við atvinnumissi hrynja eðlilegir afkomumöguleikar, félagsleg tengsl rofna og sjálfsmynd einstaklingsins skaðast. Ofan á þessar persónulegu hremmingar bætist að samfélagið fær ekki notið hæfileika og kunnáttu fjölda einstaklinga.

ASÍ hefur lagt mikla áherslu á það við stjórnvöld að þrátt fyrir erfiða stöðu ríkissjóðs væri brýnasta verkefnið að halda atvinnustiginu uppi. Með því að fólk héldi vinnunni væru líkur á persónulegu efnahagshruni takmarkaðar þó efnahagslíf þjóðarinnar væri í lægð.

Gylfi sagði að ASÍ hafi komið fram með ýmsar hugmyndir í þessu sambandi. Ein slík hugmynd var að fá lífeyrissjóði til að fjármagna mikilvægar og hagkvæmar framkvæmdir.

Það voru mikil vonbrigði að stjórnarflokkarnir skyldu nálgast hugmyndir um einkaframkvæmdir með gamaldags viðhorfum. Afleiðingin er sú að mun minna hefur orðið úr framkvæmdum t.d. í vega- og jarðgangnagerð en vonir okkar stóðu til.

Gylfi segir að tillögur stjórnarflokkanna um Rammaáætlun sé að sama marki brenndar, enda sé Rammaáætlun forsenda fyrir því að hægt sé að gera áætlanir um uppbyggingu orkufrekrar en umhverfisvænnar atvinnustarfsemi.

Eftir að mikil og góð vinna hafði verið lögð í verkið var dapurlegt að sjá málið þynnast út í bakherbergjum stjórnarflokkanna með niðurstöðu sem er ekki í samræmi við þá faglegu vinnu sem áður hafði verið unnin.

Gylfi beindi gagnrýni sinni einnig að bönkunum sem hafa, að hans mati, tekið sér allt of langan tíma að koma að endurskipulagningu á skuldum heimila og fyrirtækja.

Þessi seinagangur hefur orðið til þess að heimilin sem kaupendur og fyrirtækin sem framleiðendur eru lengur en ella að koma sér upp úr öldudalnum. Við erum því enn að glíma við sama vandann í atvinnumálum og frá því skömmu eftir hrun. Hér hefur engin fjölgun orðið á störfum frá 1. ársfjórðungi 2009 til 1. ársfjórðungs 2012.

Loks hvatti Gylfi stjórnvöld og atvinnulífið til að sýna hugrekki við fjármögnun framkvæmda.

Ísland er land tækifæranna. Hér er mikill mannauður og auðlindir af náttúrunnar hendi. Við höfum hugvitið, hrein matvæli til lands og sjávar, endurnýjanlega orku og land sem er eftirsóknarvert að heimsækja. Hér eru því allar forsendur til að fjölga störfum verulega á næstu árum. En þá verða stjórnvöld og atvinnulífið að hafa kjark til að nýta af skynsemi og hógværð þær auðlindir sem við eigum. Þau verða að hafa kjark til að fara nýjar leiðir þegar kemur að fjármögnun samfélagslegra hagkvæmra framkvæmda. Til að innviðir samfélagsins styrkist og það öryggisnet þéttist sem við viljum hafa, verðum við Íslendingar að nýta allar vinnufærar hendur. Það er velferð einstaklingsins að hafa vinnu til að sjá sér og sínum farborða.

Hér má lesa ávarp Gylfa.