Sakar 365 um margvíslega og alvarlega misnotkun á markaðsráðandi stöðu

Myllusetur ehf., útgáfufélag Viðskiptablaðsins og Fiskifrétta, hefur sent kvörtun til Samkeppniseftirlitsins vegna framferðis 365-miðla á auglýsingamarkaði. Félagið segist hafa undir höndum upplýsingar sem styðja þessar ásakanir.

Þetta kemur fram í yfirlýsingu sem birt er á vef Viðskiptablaðsins.

Þar segir að 365-miðlar hafi, að mati Mylluseturs, brotið samkeppnislög númer 44/2005 með „margvíslegum og alvarlegum hætti“ í viðskiptaskilmálum sínum.

Háttsemi fyrirtækisins felst m.a. í einkakaupum, tryggðarafsláttum, skaðlegri undirverðlagningu og samtvinnun ólíkrar þjónustu. Samkvæmt 11. gr. samkeppnislaga er markaðsráðandi fyrirtækjum óheimilt að viðhafa slíka háttsemi.

Eru brotin einkum í tengslum við útgáfu á Fréttablaðinu og sölu auglýsinga, segir í tilkynningunni.

Myllusetur ehf. byggir kvörtun sína á upplýsingum sem það hefur undir höndum og hefur félagið gert ítarlega grein fyrir forsendum kvörtunarinnar í erindi til Samkeppniseftirlitsins.

Heiðrún Lind Marteinsdóttir hdl. á lögmannstofunni Lex gætir hagsmuna Mylluseturs ehf. í málinu. Samkeppniseftirlitið hefur málið nú til skoðunar.

Myllusetur ehf. mun ekki tjá sig frekar á þessu stigi málsins.