Svona ætlar ríkisstjórnin að koma atvinnulífinu af stað

Frá blaðamannafundi ríkisstjórnarinnar. Mynd/Pressphotos.biz

Ríkisstjórnin kynnti í dag fjárfestingaáætlun sem gerir ráð fyrir fjárfestingu upp á 88 milljarða króna fram til ársins 2015. Ætlunin er að skapa um 11 þúsund störf gangi áætlunin eftir. 17 milljarðar af sérstöku veiðigjaldi verða notaðir í áætlunina.

Ríkisstjórnin samþykkti áætlunina í morgun og kynnti hana á blaðamannafundi nú eftir hádegi.

Í tilkynningu forsætisráðuneytisins segir að áætlunin sé liður í „nýrri sókn“ eftir efnahagshrunið og henni sé ætlað að styðja við efnahagsbata og hagvöxt.

Ríkisstjórnin gerir ráð fyrir að stór hluti þeirra fjármuna sem lagðir voru fram til að endurfjármagna bankakerfið skili sér aftur og verða þeir notaðir til að fjármagna áætlunina. Enn fremur gerir ríkisstjórnin ráð fyrir því að sérstakt veiðigjald, sem kveðið er á um í öðru af kvótafrumvörpum ríkisstjórnarinnar, standi straum af stórum hluta áætlunarinnar.

Alls er gerð tillaga um verkefni sem leiða af sér fjárfestingu fyrir um 88 milljarða króna. Þar af er gert ráð fyrir að 39 milljarðar verði fjármagnaðir úr fjárfestingaráætluninni.

Fjármögnunin er tvíþætt. Annars vegar koma 17 milljarðar af sérstöku veiðigjaldi og leigu aflahlutdeilda. Þetta er sett fram með þeim fyrirvara að kvótafrumvörpin verði samþykkt.

Hins vegar koma 22 milljarðar króna af arði og eignasölu hluta ríkisins í bönkum. Þetta er sömuleiðis sett fram með fyrirvara um að eignasalan gangi eftir.

Ríkisstjórnin gerir ráð fyrir að fá allt að 125 milljarða króna út úr veiðigjaldi og endurheimtum úr fjármálafyrirtækjum.

Frá og með næsta ári munu tekjur af veiðigjöldum renna til fjárfestingaáætlunarinnar, en í ár verða þær notaðar til að styrkja stöðu ríkissjóðs.

Frá og með árinu 2013 er gert ráð fyrir að 2,5 milljarðar króna renni til samgangna og jarðgangagerðar, 2 milljarðar ganga til eflingar rannsóknasjóðs og tækniþróunarsjóðs og 1,2 milljarðar renna til atvinnuþróunar og sóknaráætlana á vegum landshlutasamtaka.

Önnur verkefni eru sett fram með fyrirvara um að áætlanir um arð og eignasölu af bönkum gangi eftir.

Rétt er að taka fram að hér er um afar varfærið mat á þjóðhagslegum áhrifum  að ræða. Gert er ráð fyrir að fjárfestingaráætlunin í heild skapi 4.000 bein störf, en m.v. algengar forsendur um óbein og afleidd störf má ætla að heildaráhrifin verði um 11.000 störf,

segir í tilkynningunni. Auknar skatttekjur af völdum áætlunarinnar gætu numið 17 milljörðum króna á þremur árum, auk þess sem 2 til 3 milljarðar sparast vegna minna atvinnuleysis.

Kveikjuna að gerð þessarar fjárfestingaáætlunar má meðal annars rekja til hugmynda sem Guðmundur Steingrímsson, þingmaður Bjartrar framtíðar, kom á framfæri við forystu ríkisstjórnarinnar undir lok síðasta árs. Voru hann og Heiða K. Helgadóttir stjórnarformaður Bjartrar framtíðar höfð með í ráðum í upphafi vinnslunnar og við lok hennar. Guðmundur mun koma að framkvæmd áætlunarinnar í gegnum ráðherranefnd um atvinnumál.