Gleymið Vaðlaheiðargöngum – Styttið frekar veginn framhjá Blönduósi

Þór Saari, þingmaður Hreyfingarinnar.

Atvinnuþróunarfélag Eyjafjarðar skorar á Alþingi að samþykkja frumvarp fjármálaráðherra um fjármögnun Vaðlaheiðarganga hið fyrsta. Þingmaður Hreyfingarinnar segir að félagið ætti frekar að beita sér fyrir styttingu vegarins framhjá Blönduósi, enda muni göngin aldrei standa undir sér.

Atvinnuþróunarfélagið sendi öllum þingmönnum áskorunina í tölvupósti í gær, en undir hana ritar Þorvaldur Lúðvík Sigurjónsson, framkvæmdastjóri. Frestur til að skila inn tilboðum í gerð ganganna rennur út 14. júní, en í áskoruninni segir að tafir á verkefninu hafi þegar valdið umtalsverðum skaða.

Atvinnuþróunarfélagi Eyjafjarðar þykir miður hvernig staðreyndir málsins hafa ekki átt greiðan aðgang að umræðunni um þetta mikla hagsmunamál. Minnt er á að um er að ræða flýtiframkvæmd. Misskilningur er uppi um áhættu ríkissjóðs af verkefninu.  Áréttað er að ríkissjóður ábyrgist fjármögnun framkvæmdanna. Lánin verða greidd af veggjöldum en ekki úr ríkissjóði. Framkvæmdin tekur ekki fé frá öðrum brýnum verkefnum og þeir fjármunir sem ætlaðir eru í gerð ganganna skerða ekki möguleika annarra samgönguverkefna,

segir í áskoruninni og eru þingmenn hvattir til að „bregða ekki fæti fyrir þessa brýnu framkvæmd.“

Þór Saari svarar Þorvaldi og bendir honum á blaðagrein Björgvins Sighvatssonar forstöðumanns hjá Lánasýslu ríkisins frá 24. maí sl. Þar færði Björgvin ítarleg rök fyrir því að gerð Vaðlaheiðarganga „muni hvorki ganga upp fjárhagslega fyrir ríkissjóð né vera þjóðhagslega arðbær.“

Vaðlaheiðargöng munu aldrei standa undir sér og munu því taka lánsfé frá öðrum brýnni framkvæmdum. Ég tel að þið ættuð frekar að beita ykkur fyrir styttingu vegarins franhjá Blönduósi, þeim annars ágæta bæ,

segir Þór í svari sínu til Þorvalds. Höskuldur Þórhallsson, Framsóknarflokki, svarar sömuleiðis Þór Saari.

Það hefur ekki staðið til að taka lán og nota í framkvæmdir. Sér í lagi miðað við núverandi skuldastöðu ríkissjóðs Í undantekningartilvikum er það þó réttlætanlegt þegar notendur eru reiðubúnir að greiða fyrir þjónustuna og hún talin standa undir sér. Jafnvel þó hún gerði það ekki nema sem nemur 70% þá yrði það ódýrasta leiðin fyrir ríkissjóð.

Fullyrðingar um að það sé hægt að taka lán fyrir öðrum framkvæmdum fæst því ekki staðist enda enginn hreyft við þeirri hugmynd fyrr eftir því sem ég best veit.

Frumvarp um fjármögnun Vaðlaheiðarganga er komið til 2. umræðu í þinginu, en óvíst er hvenær hægt verður að ljúka umræðunni þar sem umræðu um kvótafrumvörpin er enn ólokið. Í nefndaráliti meirihluta fjárlaganefndar segir um fjármögnunina.

Markmið frumvarpsins er að veita fjármálaráðherra heimild til að undirrita lánasamning við Vaðlaheiðargöng hf. (VHG hf.) fyrir allt að 8.700 millj. kr. á verðlagi í árslok 2011. Félagið er að 51% hluta í eigu ríkisins og fer Vegagerðin með hlut ríkissjóðs og skipar formann stjórnar félagsins. Afgangurinn er í eigu Greiðrar leiðar ehf. en hluthafar eru Akureyrarbær, KEA svf., Þingeyjarsveit og tólf önnur sveitarfélög og sjö lögaðilar. Markmið félagsins er að innheimta veggjalda standi undir fjárfestingunni að fullu. Samkvæmt frumvarpinu mun ríkissjóður fjármagna framkvæmdalánið með sölu markaðsskuldabréfa. Gert er ráð fyrir að endurfjármagna lánið árið 2018 á almennum lánamarkaði.