Fimmtudagur 11.02.2016 - 19:11 - Ummæli ()

Sigríður Ingibjörg ræðst gegn Árna Páli – „Hvers vegna barst bréf formannsins svona seint?“

sigríður ingibjörg árni pállSigríður Ingibjörg Ingadóttir, þingmaður Samfylkingarinnar, gagnrýnir Árna Pál Árnason, formann Samfylkingarinnar, harðlega í færslu á Facebook í dag. Sigríður Ingibjörg endurbirtir grein sem hún skrifaði í janúar 2014, þar sem hún boðaði uppgjör í flokknum. Hún segir að Árni Páll hafi ekki sýnt af sér forystu, leitt stefnumörkun eða gert upp við kosningaósigur.

Árni Páll sendi flokksmönnum í dag bréf, líkt og Eyjan greindi frá, þar sem hann boðar uppgjör við fortíðina og varpar stórum sprengjum. Hann viðurkennir viðurkennir að flokkurinn hafi gert afdrifarík mistök í veigamiklum málum á borð við Icesave, aðildarumsókninni að ESB, skuldamálum heimilanna, sjávarútvegsmálum og stjórnarskrármálinu. Hann segir alla innan flokksins þurfa að bera ábyrgð á þeirri stöðu sem flokkurinn er í, ekki bara suma.

Sigríður Ingibjörg, sem tapaði með einu atkvæði í síðustu formannskosningum fyrir Árna Páli, segir að hún endurbirti greinina núna í tilefni af bréfi Árna Páls. Nú séu tvö ár liðin frá birtingu greinarinnar, nær þrjú ár frá kosningatapinu og rúmt ár í næstu kosningar en viðbrögð formanns hafi ekki birst fyrr en í dag.

Hvers vegna barst bréf formannsins svona seint? Er ekki hlutverk formanns að leiða stefnumörkun flokksins og gera upp við kosningaósigur? Það er ljóst af grein minni að vilji var til slíks uppgjörs í flokknum og enginn að kasta af sér ábyrgð, þó ekki væru allir sammála um ástæður fyrir slakri stöðu flokksins.

Grein Sigríðar Ingibjargar birtist í Jafnaðarmanninum, fréttabréfi Samfylkingarinnar í Reykjavík. Hana má lesa í heild sinni hér að neðan.

Í janúar 2014 birtist þessi grein eftir mig í "Jafnaðarmanninum" fréttabréfi Samfylkingarinnar í Reykjavík. Ég tel rétt…

Posted by Sigríður Ingibjörg Ingadóttir on Thursday, 11 February 2016

Áfram Samfylking.

Eftir nokkra mánuði göngum við til sveitastjórnarkosninga. Öflugir félagar eru að gefa kost á sér í flokksvali og allt stefnir í sterkan Samfylkingarlista. Kosningabaráttan er þegar hafin á Hallveigarstígnum og þar er vösk sveit tilbúin til að leggja sitt að mörkum til að jafnaðarmenn verði áfram í lykilhlutverki við stjórn borgarinnar að kosningum loknum.

Árið 2013 var erfitt fyrir Samfylkingarfólk. Við töpuðum alþingiskosningunum eftir að hafa leitt ríkisstjórn á einu erfiðasta kjörtímabili lýðveldistímans. Við náðum undraverðum árangri í efnahagsmálum, fórum í umfangsmiklar aðgerðir í skuldamálum, vörðum velferðarkerfið, fórum í árangursríkar aðgerðir gegn atvinnuleysi, breyttum skattkerfinu, settum ný náttúruverndarlög, samþykktum rammaáætlun, settum á veiðigjöld, stóðum fyrir umbótum í stjórnsýslunni og mannréttindamálum. Okkur tókst líka að auka jöfnuð en áratuginn á undan hafði ójöfnuður vaxið gríðarlega á Íslandi.

Dómur kjósenda var kveðinn upp í alþingiskosningunum og niðurstaðan var áfall þó það hafi ekki verið ófyrirséð. Það er mikilvægt að ræða fylgistapið með gagnrýnum hætti og nota þessa erfiðu reynslu til að læra af henni og byggja upp fylgi við flokkinn aftur. Ástæðurnar eru eflaust fjölbreyttar og umdeilanlegar. Sumt var hægt að sjá fyrir en annað verður skýrara þegar frá líður. Ég vil hér nefna nokkrar ástæður fylgistaps okkar til umræðu og umhugsunar.

Í fyrsta lagi ber að nefna erfið verkefni síðustu ríkisstjórnar í kjölfar efnahagshrunsins vegna afleiðinga þess. Mikið atvinnuleysi, versnandi lífskjör, skuldavandi heimila og fyrirtækja, ríkissjóður í fjárhagsvanda og laskaður gjaldmiðill. Ríkisstjórnir sem stýra löndum í gegnum „prógramm“ Alþjóðagjaldeyrissjóðsins og eru upp á fyrirgreiðslu hans og annarra landa komnar hafa takmarkað svigrúm og verða sjaldnast langlífar og vinsælar.

Í öðru lagi reyndist Icesave málið okkur erfitt viðureignar og setti stjórnarflokkanna (og raunar líka Sjálfstæðisflokkinn undir lokin) í þá stöðu að vera í sífellu sakaðir um að ganga erinda erlendra aðila á kostnað almennings á Íslandi. Það verður að segjast eins og er að ríkisstjórnin hélt ekki vel á málinu á fyrsta ári sínu og það reyndist afdrifaríkt þegar upp var staðið. Icesave málið magnaði upp þjóðernishyggju í landinu, en helstu talsmenn hennar eru sigurvegarar síðustu ára í íslenskum stjórnmálum: Ólafur Ragnar Grímsson og Sigmundur Davíð Gunnlaugsson.

Í þriðja lagi var sundrung á stjórnarheimilinu viðvarandi vandi. Í raun voru þrír flokkar í ríkisstjórninni: Samfylkingin, VG Steingríms J. Sigfússonar og VG Ögmundar Jónassonar. Hluti þingmanna VG var andsnúinn efnahagsstefnu stjórnarinnar og þrír þeirra studdu ekki fjárlög ársins 2011. Ríkisstjórnin hafði öll einkenni minnihlutastjórnar löngu áður en hún varð formlega minnihlutastjórn síðla árs 2012. Samfylkingin var lengst af samstíga, en síðasta árið brást samstaðan nokkuð, ekki síst vegna yfirvofandi formannskjörs en að hluta vegna almennrar þreytu með stjórnarsamstarfið. Hefðu flokkarnir átt að slíta samstarfinu og boða til kosninga áður en kjörtímabilið var á enda? Hugsanlega. Næg voru tilefnin í það minnsta. Sjálf taldi ég tvö skýr tilefni til að „skila umboðinu“ til Bessastaða, eftir Icesave kosningarnar fyrri og síðari.

Í fjórða lagi eru það skuldamál heimilanna. Almennar afskriftir verðtryggðra lána voru kosningaloforð Framsóknarflokksins fyrir kosningarnar 2009. Flokkurinn fékk ekki hljómgrunn þá, ekki síst vegna þess að hann gat ekki útskýrt hvernig greiða ætti fyrir afskrifir af þessu tagi. Kostnaðurinn við slíkar afskriftir var og er vandinn sem við er að eiga. Lilja Mósesdóttir má eiga það að hún talaði skýrt um hver ætti að borga brúsann. Lífeyrissjóðir landsmanna ættu að borga og taka ætti upp nýtt lífeyriskerfi. Á þetta gat Samfylkingin ekki fallist. Óljósar hugmyndir Framsóknarfokksins um að sækja fé til „hrægamma“, jafnvel hundruðir milljarða, hefðu aldrei fengið hljómgrunn nema vegna Icesave sigursins. Framsókn fékk við hann aukinn trúverðugleika, og vaxandi tortryggni í garð erlendra fjármagnseigenda gerði kjósendur móttækilegri en 2009. En hefði Samfylkingin þá ekki getað gert betur í skuldamálunum? Alveg örugglega. Í fyrsta lagi hefðum við átt að skera upp hið verðtryggða lánakerfi og koma á nýju húsnæðislánakerfi. Samfylkingin kom mörgum fyrir sjónir sem varðhundur „kerfisins“ og verðtryggingarinnar, þegar við vildum í raun stokka kerfið upp, afnema verðtryggingu og gefa upp á nýtt með upptöku Evru. Hér vorum við of varkár. Í öðru lagi var enginn ágreiningur um það innan Samfylkingarinnar að taka þyrfti á vanda þeirra sem keyptu sína fyrstu íbúð eða stækkuðu við sig af fjölskylduástæðum á bóluárunum með meira afgerandi hætti en með 110% leiðinni. Um þetta voru þó ekki skýrar tillögur mótaðar af okkar hálfu. Við skulum hafa í huga að fyrir kosningarnar fór Samfylkingin í gegnum formannskjör, prófkjör og landsfund. Hvers vegna voru skuldamálin ekki meira afgerandi á þeim tíma? Hér fór augljóslega margt úrskeiðis.

Í fimmta lagi naut flokkurinn ekki nægjanlegs trausts. Í kosningunum 2009 var flokknum ekki refsað fyrir þátttökuna í ríkisstjórn Geirs H. Haarde. Eftir rannsóknarskýrslu Alþingis þyngdist róðurinn að þessu leyti, eins og augljóst var í sveitarstjórnarkosningunum 2010. Samfylkingin hefði í kjölfarið þurft á meiri endurnýjun að halda í stefnu og frambjóðendum fyrir alþingiskosningarnar 2013. 
Í sjötta lagi var ríkisstjórnin með áform um róttækar umbætur af ýmsu tagi, en skorti nægilega markvissa áætlun og oft samstöðu um hvernig klára ætti slík mál. Hér má nefna sjávarútvegsmálin, stjórnarskrármálið og umsóknina um ESB. Við ætluðum okkur of mikið á einu kjörtímabili, rétt eins og við tryðum því ekki sjálf að stjórnin gæti haldið meirihluta lengur en eitt kjörtímabil.

Í sjöunda lagi missti flokkurinn mikið kvennafylgi. Samfylkingin hefur ætíð haft sterka stöðu meðal kvenna vegna velferðarstefnu sinnar. Óumflýjanlegur niðurskurður í almannatryggingakerfinu var okkur erfiður þó við leggðum ávallt áherslu á að verja þá sem höfðu lægstu lífeyrisgreiðslurnar. Þá voru vonbrigðin mikil þegar ekki náðist að lögfesta endurskoðun á almannatryggingakerfinu og tímasetning og kynning á nýju kostnaðarþátttökukerfi vegna lyfja var afleit. Það er einnig merkilegt að stuðningur við ESB, eitt aðal stefnumál flokksins, er minni meðal kvenna en karla.

Í áttunda lagi var kosningabaráttan ekki nógu markviss. Almennir frambjóðendur vissu vart í hvorn fótinn þeir áttu að stíga og í raun held ég að kjósendur hafi átt erfitt með að skilja boðskap okkar. Árangur síðustu ríkisstjórnar var ekki nýttur sem skyldi og framtíðarsýn okkar of almennt orðuð. Það er augljóst að flokkurinn lagði upp í kosningabaráttuna illa undirbúinn, sem er nokkur ráðgáta eftir prófkjör, formannskjör og landsfund.

Þetta eru mínar hugleiðingar, settar fram til umræðu. Mikilvægt er að eiga hreinskilnislega og uppbyggilega samræðu sem nýtist til að byggja flokkinn upp að nýju. Það er auðvelt að vera vitur eftir á en lítils virði ef sú vitneskja og ályktanir af henni eru ekki nýttar til að gera betur. Það er mikilvægt að við fáum góða kosningu í sveitarstjórnakosningunum í vor og náum þannig viðspyrnu. Hægri öflin sem nú hafa tekið við stjórn landsins verða ekki sigruð nema kjósendur treysti okkur jafnaðarmönnum, skilji stefnu okkar og viti að við vinnum í samræmi við hana. Samfylkingin var stofnuð af lýðræðissinnum, jafnaðarmönnum, femínistum, umhverfisverndarsinnum og félagshyggjufólki til að skapa raunverulegan valkost við hægri öfl stjórnmálanna. Við viljum félagslegt réttlæti, virkt lýðræði, velferð og jöfnuð. Til að svo geti orðið þurfum við að standa saman og vinna flokknum traust að nýju.

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Samið um þorskafla Íslands í Smugunni

Haldinn var samningafundur í fiskveiðinefnd Íslands og Rússlands daganna 19.-20. febrúar. Umræðuefnið var að venju framkvæmd svokallaðs Smugusamnings frá 1999 milli Íslands, Noregs og Rússlands um þorskveiðar íslenskra skipa í lögsögu Noregs og í þessu tilviki í lögsögu Rússlands fyrir árið 2018. Í samningnum er um tvenns konar kvóta að ræða. Annars vegar þann sem […]

Landvernd vill virkja vindorku

Engin stefna hefur verið mörkuð um vindorkuvirkjanir á Íslandi og því réðst Landvernd í það verkefni að semja stefnu sem byggist á náttúruverndar-sjónarmiðum með almannahagsmuni að leiðarljósi. Vonast er til aðframkvæmdaaðilar og sveitarfélög geti nýtt sér þessa stefnumörkun til að lágmarka neikvæð umhverfisáhrif slíkra framkvæmda og til að koma í veg fyrir að ráðist verði […]

Kaupskil kaupa 13% í Arion banka af ríkinu

Fjármála- og efnahagsráðherra hefur, að undangengnu samráði við ráðherranefnd um efnahagsmál og endurskipulagningu fjármálakerfisins og ríkisstjórn, fallist á tillögu Bankasýslu ríkisins um sölu á 13% hlut ríkissjóðs í Arion banka til Kaupskila ehf. (dótturfélags Kaupþings ehf.) fyrir 23,4 milljarða króna. Salan fer fram á grunni kaupréttar á hlutnum samkvæmt hluthafasamkomulagi frá árinu 2009 og lögum um […]

Áslaug sakar Sjálfstæðisflokkinn um svindl: „Leikreglum er breytt og uppstillingarvaldið sett í fárra hendur“

Borgarfulltrúi Sjálfstæðisflokksins, Áslaug Friðriksdóttir, sem fékk ekki sæti á framboðslista flokksins fyrir komandi borgarstjórnakosningar, skrifar á Facebooksíðu sína í dag. Þar segir hún farir sínar ekki sléttar í samskiptum við Sjálfstæðisflokkinn:   „Kæru vinir, enginn getur gengið að neinu vísu í pólitík. Góður stuðningur í hefðbundnum prófkjörum hefur litla þýðingu, þegar leikreglum er breytt og […]

Ríkisendurskoðun gagnrýnir ráðuneytið fyrir skort á heildarstefnu í orkumálum

Ríkisendurskoðun ítrekar ekki fimm ábendingar sem beint var til atvinnuvega- og nýsköpunarráðuneytis og Landsnets hf. árið 2015. Þetta kemur fram í nýrri eftirfylgniskýrslu Ríkisendurskoðunar, Landsnet hf. Hlutverk, eignarhald og áætlanir. Ráðuneytið hefur enn ekki brugðist við þeirri ábendingu Ríkisendurskoðunar að marka heildstæða stefnu í orkumálum til að tryggja að uppbygging og rekstur flutningskerfis raforku sé í […]

Heilbrigðisráðherra vill lögleiða rafrettur

Svandís Svavarsdóttir heilbrigðisráðherra segir frumvarp um rafrettur stuðla að lögmætum viðskiptum með þessa vöru og tryggja eftirlit og mikilvæga neytendavernd. Aðgengi fólks að rafrettum og reglur um notkun þeirra samkvæmt frumvarpinu geri þeim hægt um vik sem vilja hætta tóbaksnotkun með aðstoð þeirra. Ráðherra mælti fyrir frumvarpinu á Alþingi í gær. Eins og fram kom í ræðu […]

Hagstofan áætlar 2,9% hagvöxt á árinu

Hagstofa Íslands hefur gefið út endurskoðaða þjóðhagsspá að vetri í ritröð sinni, Hagtíðindum. Spáin spannar árin 2017–2023. Hægt hefur á hagvexti frá árinu 2016 en áætlað er að hagkerfið hafi vaxið um 3,8% árið 2017. Meiri kraftur var í þjóðarútgjöldum sem áætlað er að hafi aukist um rúmlega 7% á síðasta ári. Talið er að […]

Afgerandi meirihluti vill afsögn dómsmálaráðherra

Samkvæmt könnun Maskínu sem unnin var í samstarfi við Stundina, kemur fram að 72,5% þjóðarinnar vilja að Sigríður Á. Andersen dómsmálaráðherra segi af sér. Þeir sem vilja að hún sitji áfram eru 27,5 prósent. Hlutfallið er yfir 67% hjá fylgjendum allra stjórnmálaflokka, nema Sjálfstæðisflokksins og Miðflokksins, en 23% Sjálfstæðismanna vilja afsögn Sigríðar og rúm 44 […]

Haraldur hugsar málið varðandi framboð til varaformennsku

Haraldur Benediktsson, fyrsti þingmaður Norð-vestur kjördæmis fyrir Sjálfstæðisflokkinn, segist ætla að hugsa sig um hvort hann bjóði sig fram til varaformennsku í flokknum á landsfundi sjálfstæðisflokksins um miðjan mars, eftir fjölda áskorana. Þetta kemur fram í Morgunblaðinu í dag.   „Já, ég get staðfest það að margir hafa komið að máli við mig og skorað […]

Ingvar Mar leiðir lista Framsóknar

Ingvar Mar Jónsson, flugstjóri og fyrrum varaþingmaður- og borgarfulltrúi, mun leiða lista Framsóknarflokksins í komandi borgarstjórnarkosningum. Fjórar konur skipa næstu fimm sæti. Höfuðáhersla Framsóknarflokksins í Reykjavík verða skólamál samkvæmt tilkynningu, en þrír frambjóðendur eru með kennaramenntun. Viðskeytið flugvallarvinir er hvergi sjáanlegt í tilkynningu frá Framsóknarflokknum að þessu sinni og má því áætla að það verði ekki […]

Listi Eyþórs klár – Tveimur borgarfulltrúum bolað burt

Sjálfstæðismenn kynntu endanlegan framboðslista sinn í kvöld, fyrir borgarstjórnarkosningarnar í maí. Borgarfulltrúarnir Kjartan Magnússon og Áslaug Friðriksdóttir eru ekki á listanum, en Marta Guðjónsdóttir borgarfulltrúi er í fimmta sæti listans. Hildur Björnsdóttir lögfræðingur er í öðru sæti, Valgerður Sigurðardóttir því þriðja, og Egill Þór Jónsson í fjórða. Heildarlistinn er hér að neðan:   1. Eyþór Lax­dal […]

Fjárframlög til stjórnmálaflokka hækka um 127% : Sjálfstæðisflokkur fær mest – Viðreisn minnst

Fjármála- og efnahagsráðuneytið hefur tekið saman upplýsingar um greiðslur ríkisins til stjórnmálasamtaka fyrir árið 2018. Framlög fara eftir stærð flokkanna samkvæmt atkvæðafjölda og fær því Sjálfstæðisflokkurinn hæsta framlagið, eða rúmar 166 milljónir. Viðreisn fær minnsta framlagið, eða rétt tæpar 44 milljónir. Framlagið hækkar milli ára um 127 prósent. Tillaga um að hækka framlög til flokkanna […]

Björn Valur þjófkennir þingmenn-Segir marga vísvitandi brjóta reglurnar-Á pari við Árna Johnsen

Björn Valur Gíslason, fyrrum varaformaður VG, segir það gott mál að nú skuli greiðslur Alþingis til þingmanna verða gerðar opinberar, líkt og til stendur samkvæmt Steingrími J. Sigfússyni, forseta Alþingis. Hann telur einnig sjálfsagt að Alþingi endurgreiði útgjöld þingmanna, þeir eigi ekki að „verða fyrir útgjöldum vegna starfa sinna.“ Það sem er eftirtektavert er að […]

Pawel býður sig fram í borginni

Pawel Bartoszek, fyrrum þingmaður Viðreisnar, segist á Facebook síðu sinni hafa komið því áleiðis til uppstillingarnefndar Viðreisnar, að hann sækist eftir sæti ofarlega á lista flokksins í komandi borgarstjórnarkosningum.   „Reykjavík er frábær borg. Hún dregur til sín hæfileikaríkt fólk frá öllu landinu og öllum heimshornum. Hún er oftar en ekki aðdráttaraflið dregur þá Íslendinga […]

Frjáls fjölmiðlun ehf. - Kringlunni 4-12, 103 Reykjavík - eyjan (hjá) eyjan.is