Mánudagur 26.11.2012 - 14:44 - Ummæli ()

ESB-aðildin fjarlægist í prófkjörum

Eftir því sem við fáum úrslit úr fleiri prófkjörum og af uppstillingu framboðslista fjarlægist ESB-aðild Íslendinga. Ef erfitt er að koma henni í gegnum það þing sem nú situr, þá verður það nánast ómögulegt á næsta þingi.

Á leið út eru Birkir Jón Jónsson og Siv Friðleifsdóttir, þau hafa helst hallast undir Evrópusambandsaðild hjá Framsóknarflokknum, hugsanlega líka Margrét Tryggvadóttir og Þór Saari úr hreyfingunni.

Björn Valur Gíslason hefur verið einna jákvæðastur VG-ara í garð ESB, hann dettur út – Ögmundur heldur áfram. Hefði hann fallið úr fyrsta sæti í Kraganum hefði hann líklega farið í sérframboð, í staðinn er hann áfram sterkt afl inni í flokknum.

Að ógleymdri Þorgerði Katrínu Gunnarsdóttur hjá Sjálfstæðisflokknum.

Inn koma ný þingmannsefni eins og bændaforinginn Haraldur Benediktsson fyrir Sjálfstæðisflokkinn  í Norðvesturkjördæmi, Brynjar Níelsson og hugsanlega Sigríður Á. Andersen í Reykjavík. Hanna Birna Kristjánsdóttir prófkjörssigurvegarinn mikli, vill ekki ESB, ef maður skilur rétt.

Í Reykjavík bendir allt til að Framsókn stilli upp Vigdísi Hauksdóttur í fyrsta sæti öðru kjördæminu og Frosta Sigurjónssyni í hinu, þau eru bæði eindregið á móti aðild. ESB-andstaðan hefur sigrað í Framsóknarflokknum.

Þetta er í raun bara einföld hausatalning, óhjákvæmilegt virðist að fylgi við ESB-umsóknina minnki verulega á næsta þingi – og bætist við háværir andstæðingar hennar.

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Frjáls fjölmiðlun ehf. - Kringlunni 4-12, Reykjavík - eyjan (hjá) eyjan.is