Mánudagur 20.03.2017 - 21:13 - Ummæli ()

Drungalegi Laugavegur – aðeins 21 prósent af götuljósum virka

Í dag eru jafndægur á vori, daginn lengir óðum og vorið er á næsta leyti. Dagarnir undanfarið hafa verið kaldir, dálítið glærir, það er mikið ryk í bænum og mengun – mörgum finnst svona veður óþægilegt, ekki síst þeim sem hafa tilhneigingu til hausverkja. Það á að hlýna og rigna á fimmtudaginn, þá skolast skíturinn vonandi burt.

Ég fór í gönguferð áðan upp Skólavörðuholtið, svo aðeins inn í Goðahverfið og niður á Laugaveg. Ég hef veitt því athygli undanfarið hversu lýsingin á Laugaveginum er frámunalega léleg – og hversu kaflar á götunni eru drungalegir. Það er dálítið skrítið, þetta er aðalverslunargata bæjarins og þarna er yfirleitt krökkt af ferðamönnum.

Ég gerði það að leik mínum að telja götuljósin frá því neðst á Laugaveginum og upp að Frakkastíg. Þau hafa verið í miklu ólagi í nokkurn tíma. Niðurstaðan var að þarna eru alls 24 götuljós. Af þeim voru aðeins 5 í lagi.

Það er semsagt einungis ljós á 21 prósenti af götuljósunum á neðri hluta Laugavegar. En sama vandamál virðist vera í ýmsum hliðargötum sem liggja frá Laugavegi. Annað sem íbúar í hverfinu velta stundum fyrir sér er hversu ljósin eru dauf – þ.e. þau sem lýsa. Það er eins og perurnar séu ekki sérlega sterkar.

Ekki kann ég skýringu á þessu, á þessum götuhluta hefur náttúrlega verið mikið um framkvæmdir og rask – en varla er hægt að segja annað en að þetta sé slóðaskapur. Nema menn séu búnir að ákveða að ljósin úr búðargluggum eigi að nægja. Það dugir þó varla, því á svæðinu er talsvert um óupplýstar byggingalóðir. Rétt er að taka fram að fyrir ofan Frakkastíg virka ljósin ágætlega. En kannski er mönnum sama, hugsa sem svo að á hinum björtu nóttum sumarsins sem fer í hönd sé götulýsing óþörf.

 

 

Þetta er hornið á Laugavegi og Frakkastíg. Fyrir ofan loga götuljós, fyrir neðan eru varla ljós nema á stangli.

 

 

Þetta er Laugavegur 28. Náttúrlega logar ekki á luktinni fyrir utan. Það er nýbúið að taka utan af húsinu. Það er gerbreytt frá því sem áður var, ég verð að viðurkenna að ég skil ekki hina dimmu umgjörð utan um gluggana. Svona leit þetta út áður, ekkert stórkostlega fagurt en samt léttara yfirbragð.

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Eyjan Media ehf. - Kringlunni 4-12, Reykjavík - eyjan (hjá) eyjan.is